Semeytany.kz — Абай облысының әкімі Берік Уәли Қазақстан Республикасының Конституциясы күнімен жерлестерін құттықтап, Ата Заң қабылданғанына 30 жыл толғанын атап өтті. Ол Конституцияның ел тәуелсіздігі, саяси тұрақтылық және қоғамдық келісімнің берік тірегі екенін айтты.
Әкім құттықтауында қазақ даласының құқықтық дәстүрлері – «Әз-Тәукенің жеті жарғысы», Абайдың «Қарамола ережесіндегі» әділдік ұстанымы және Алаш арыстары аңсаған теңдік идеялары бүгінгі Мемлекет басшысы Қасым-Жомарт Тоқаев ұсынған «Заң мен тәртіпке» негізделген «Әділетті Қазақстан» тұжырымдамасымен сабақтас екенін жеткізді.
Берік Уәлидің айтуынша, осы құндылықтар рухына сай әрекет ету – елдігімізді нығайтып, бірлігімізді бекемдейді. «Әділдік бар жерде ынтымақтың туы жығылмас» деген халық даналығын мысал еткен аймақ басшысы барша тұрғындарға денсаулық, еңбекте табыс және отбасына амандық тіледі.
