Semeytany.kz — Қазақстан Республикасы Конституциясының 30 жылдығына орай Мақаншы ауданына қарасты Қабанбай ауылдық округінде өрт сөндірудің тірек бекеті ашылды.
Іс-шараға Мақаншы ауданының әкімі Дәурен Қойгелдин және Абай облысы төтенше жағдайлар департаментінің басшысы Манарбек Шапағатов қатысып, нысанның маңызына тоқталды.
Жаңа бекет заманауи талаптарға сай жабдықталған: мұнда «Урал» және КамАЗ маркалы өрт сөндіру көліктері бар. Қызметке үш өрт сөндіруші тартылған. Олар төрт су бүріккіш қондырғымен, жауынгерлік және күнделікті киім-кешекпен, өзге де қажетті құрал-жабдықтармен қамтылған.
Кезекшілікті тиімді ұйымдастыру үшін бекетте жатын орын, кезекшілік телефоны және байланысқа арналған рациялар қарастырылған.
Жаңадан ашылған тірек бекеті ауыл тұрғындарының қауіпсіздігін күшейтіп, төтенше жағдайларға жедел әрекет ету уақытын қысқартуға, сондай-ақ елді мекендердегі халықтың өмірі мен мүлкін өрттен қорғауға қызмет етпек.
