Semeytany.kz — Жарма ауданы, Георгиевка орта мектебінің 9-сынып оқушысы Ералы Қыстаубай ауыл шаруашылығына арналған автоматты суару роботының прототипін жасап шығарды. Құрылғы топырақтың ылғалдылығын өлшеп, қажеттілігіне қарай су жіберуді өзі басқарады.
Робот күн батареясынан қуат алады. Жүйе құрамына сорғы, қозғалтқыш, дөңгелек, аккумулятор және басқару модулі кіреді. Ералының айтуынша, мұндай шешім су ресурсын үнемдеп, өнімділікті арттыруға әрі қол еңбегін азайтуға мүмкіндік береді. Аппаратты жылыжайда, егістікте және шағын бақшада қолдануға болады.
Жоба барысында оқушы ылғалдылық сенсорларын баптап, суарудың тиімді алгоритмін құрды, сызбасын және 3D моделін дайындады, микроконтроллерді бағдарламалап, дайын құрылғыны құрастырды. Прототип мектеп ауласында және жылыжайда сынақтан өткізілді.
«Мақсатым – табиғатты қорғау және ауыл шаруашылығын заманауи технологиямен дамыту. Болашақта мұндай роботты фермерлерге ұсынсам деймін», – дейді жас өнертапқыш. Ералы келешекте құрылғысына жасанды интеллект элементтерін енгізіп, жұмысын одан әрі жетілдіруді жоспарлап отыр. Жобаның жетекшісі – информатика пәнінің мұғалімі Жанар Шаймұратова.
