Бұл туралы Қазақстан Президентінің кеңесшісі — баспасөз хатшысы Руслан Желдібай өзінің Facebook парақшасында жазды.
— Мемлекет басшысы Қазақстан үш жыл ішінде міндетті түрде цифрлық ел болуы керек деген міндет қойды, — деп жазды ол.
Осыған орай бірнеше маңызды бастама көтерді:
Цифрлық кодексті тезірек қабылдау. «Заңда жасанды интеллект, платформалық экономика, үлкен дерекқорларды пайдалану және басқа да мәселелер айқындалуға тиіс»;
Жасанды интеллект және цифрлық даму министрлігін құру;
Цифрлық активтердің толыққанды экожүйесін қалыптастыру
Цифрлық теңгенің қолдану аясын одан әрі кеңейту қажет.
Ұлттық банктің инвестициялық корпорациясы негізінде Цифрлық активтердің мемлекеттік қорын құрған жөн.
Alatau City қаласын аймақтағы толық цифрланған алғашқы қалаға айналдыру.
«Мұнда Smart City технологияларын қолданудан бастап тауарлар мен қызмет ақысын криптовалютамен төлеуге дейінгі жаңалықтың барлығы енгізілуі керек»;
Мектеп оқушыларына арналған жасанды интеллект негіздері туралы бағдарлама және оқу материалдарын әзірлеу.
Президент тапсырмасымен қашықтан оқыту тәсілі және жасанды интеллект технологиясы негізінде «Qazaq Digital Mektebi» атты шағын жинақты мектеп үлгісі жасалады;
Бұдан бөлек, ол Мемлекет басшысы ЖИ технологиясы мен цифрлық құралдарды геологиялық барлау, ауыл шаруашылығы, кеден және логистика, құрылыс, су ресурстарын басқару секілді бірнеше бағытта кеңінен қолданудың маңызына тоқталғанын жеткізді.
Мемлекет басшысы Жолдауда инвестициялық ахуалды жақсарту, кәсіпкерлерді ынталандыру және олардың құқығын қорғау жөнінде бірқатар маңызды ұсыныс айтты.
Бас прокуратураның Заңсыз активтерді қайтару жөніндегі комитеті Инвесторлардың құқығын қорғау жөніндегі комитет болып өзгереді.
Жалпы, Бас прокуратура жұмысының нәтижесінде қазынаға 850 миллиард теңгеге жуық қаржы қайтарылды. Қаржы 10 мектеп, 4 спорт ғимараты, 235 денсаулық сақтау нысаны мен 177 су инфрақұрылымы нысанының құрылысына және жөндеу жұмыстарына жұмсалды;
Ұлттық қордың тұрақты даму құралы ретінде рөлін қайта қарау қажет. «Қорды қосымша инвестиция көзі ретінде қолдану үшін ел ішіндегі болашағы зор және нарықтағы әлеуеті жоғары болатын жобаларға қаржы бөлуге болады»;
Ұлттық банк пен Үкімет банктердің ақшасын экономикаға барынша тартудың тиімді тәсілдерін табуы керек.
Арнайы экономикалық аймақтарды басқаруға жеке компанияларды, қажет болса, шетел компанияларын тартуға болады.
Кәсіпкерлер — елімізді цифрлық дамытудың қозғаушы күші;
Жаңа Салық кодексі салық төлеушілердің ашықтық пен адалдыққа негізделген жаңа таным-түсінігі мен болмысын қалыптастыруға тиіс;
Салықтан түскен әр теңге халықтың игілігіне жұмсалуға тиіс. Бұл – азаматтарға сапалы мемлекеттік қызмет көрсетіліп, инфрақұрылым салынып, мемлекеттік қолдау шаралары ұсынылуы қажет деген сөз.
Өнеркәсіп, энергетика саласындағы жетістерді еселей түсу қажет:
Соңғы бес жылда өңдеу өнеркәсібінде бірқатар жетістік бар.
Өңдеу өнеркәсібінің жалпы қосымша құны екі есе өсіп, 17 триллион теңгеге жуықтады. Ал оның жалпы ішкі өнімдегі үлесі 12,4 пайызға жетті. Былтырдың өзінде 163 жаңа өндіріс іске қосылды.
Ең маңызды бағыттар: металлургия, автокөлік өндірісі, газ-химия кешені т.б.
Экономиканы тұрақты дамыту үшін бір АЭС жеткіліксіз. Екінші, тіпті үшінші атом электр станциясының құрылысын қазірден бастап жоспарлай беруіміз керек;
ҚХР-мен атом саласындағы стратегиялық серіктестік туралы уағдаластыққа қол жеткізілді;
Геология барлау жұмыстарын күшйтіп, жер қойнауына қатысты мәліметтің бәрін, ең алдымен, жасанды интеллектіні енгізу арқылы жүйелеп, цифрландыру қажет.
Президент жолдауда ауыл шаруашылығын жаңа деңгейде көтеру жолдарына тоқталды.
Атап айтқанда Үкіметке және Ауыл шаруашылығы министрлігіне:
Үздік агро холдингтердің тәжірибесін жаппай тарату;
Агрохабтар және логистика орталықтарын дамыту;
Мал шаруашылығы саласындағы агробизнесті қолдау жоспарын әзірлеп, нақты қаржыландыру шараларын бастау;
Елдегі азық-түлік нарығының импортқа тәуелділігін барынша азайту;
Аграрлық экспорттың нақты жоспарын әзірлеу;
ЕАЭО аясында отандық кәсіпкерлердің мүддесін қорғау;
Ауыл шаруашылығы жерлерін беру тәсілдерін түбегейлі өзгерту тапсырылды.
— Бұдан бөлек, Мемлекет басшысы көлік-логистика, тұрғын үй-коммуналдық шаруашылық, құрылыс, су ресурстарын басқару, білім, ғылым және инновацияны дамыту секілді маңызды бағыттардағы стратегиялық мақсаттарды айқындады,-деді Қазақстан Президентінің кеңесшісі.
