Президент Қасым-Жомарт Тоқаевтың биылғы Жолдауы – еліміздің жаңа даму бағытын айқындап берген аса маңызды құжат. Бұл жолы Мемлекет басшысы заманауи технологиядан бастап, экономика, әлеуметтік жағдай, саясат, қоғам өміріне дейінгі барлық негізгі салаларды қамтыды.
Әсіресе, жасанды интеллект пен цифрлық технологияларға ерекше тоқталды. Бүгінгі заманның басты талабы да осы. Жаңа технологияларды меңгеру – елдің бәсекеге қабілеттілігін арттырады, жастарға жаңа мүмкіндіктер ашады, экономиканы жаңа деңгейге көтереді. Бұл – еліміздің болашағына жасалып отырған инвестиция.
Сонымен қатар, Президент заң мен тәртіпті сақтау мәселесін де ерекше атап өтті. Қоғам әділдікке сүйенгенде ғана тұрақты дамиды. Әр азамат өзін қорғалған сезінсе, мемлекеттің де іргесі берік болады. Заң үстемдігі – кез келген өркениетті елдің басты тірегі.
Экономика тақырыбында көтерілген басты мәселе – инфляция. Бұл халықтың күнделікті өміріне тікелей әсер етеді. Сол себепті Үкімет пен Ұлттық банктің күш біріктіріп, тиімді шешім қабылдауы – уақыт талабы. Инфляцияны ауыздықтау – әрбір отбасының тұрмыс жағдайын жақсартудың кепілі.
Энергетика саласында айтылған бастамалар да ел үшін стратегиялық маңызға ие. Ядролық қуат көзін дамыту – ұзақ мерзімді тұрақты даму кепілі. Әрине, бұл ретте қауіпсіздік мәселесі бірінші орында тұруы қажет.
Саяси салада Парламент құрылымын қайта қарау бастамасы көтерілді. Бұл – батыл шешім. Мұндай маңызды өзгерістерді қоғам болып талқылап, әр азаматтың пікірін ескеру – демократиялық қадам.
Жолдауда ерекше мән берілген тағы бір маңызды тақырып – «Қарызсыз қоғам» жобасы. Бұл бастама әр отбасының жүрегіне жақын деп ойлаймын. Өйткені қарыздан құтылып, қаржылық сауатты болу – адамдардың тұрмысын жеңілдетіп қана қоймай, болашаққа деген сенімін нығайтады.
Мен халықпен кездескен сайын осы мәселенің қаншалықты өзекті екенін көремін. Азаматтар қарыздан арылып, дұрыс қаржылық шешім қабылдауға үйренгісі келеді. Қуаныштысы – бұл жоба нақты нәтижесін беріп жатыр. Былтыр республика бойынша 845 мыңнан астам азамат кеңес алып, білімін жетілдірсе, тек біздің Абай облысының өзінде биылғы 8 айдың ішінде 11 497 тұрғын арнайы оқудан өтті. Бұл – халықтың үлкен ынтасы бар екенін және біздің дұрыс бағытта келе жатқанымызды дәлелдейді.
Қаржылық сауаттылық – тек есеп-қисап қана емес. Бұл – отбасының тыныштығы, болашаққа деген сенім, өз өмірін дұрыс жоспарлау мәдениеті. Президенттің бұл бастаманы қолдауы біз үшін үлкен демеу әрі зор жауапкершілік. Сондықтан қаржылық сауатты азаматтарды қалыптастыру – барлығымыздың ортақ міндетіміз.
Жалпы алғанда, Жолдау – ел дамуының жаңа кезеңіне жол ашатын бағдаршам іспетті. Онда қойылған әрбір бастама халықтың тұрмысын жақсартуға, мемлекетімізді жаңа белеске шығаруға бағытталған. Ең бастысы – бұл жолғы Жолдау әрбір қазақстандықтың өміріне тікелей әсер ететін нақты шешімдермен ерекшеленді.
Айдар Садырбаев
Аманат партиясы Абай облыстық филиалының төрағасы
