Semeytany.kz — Абай облысының әкімі Берік Уәли «Самұрық-Энерго» АҚ басқарма төрағасы Қайрат Мақсұтовпен кездесіп, Семей қаласында үшінші жылу электр орталығын салу жобасын талқылады.
Кездесуде аймақ басшысы Президент тапсырмасына сай ЖЭО-3 құрылысы Үкіметтің ерекше бақылауында екенін атап өтті. Оның айтуынша, қаланың оң жағалауында жылу тапшылығы сезіліп отыр, сондықтан ескірген әрі тиімсіз қазандықтарды кезең-кезеңімен тоқтату және жаңа қуат көздерін іске қосу маңызды. Облыс әкімдігі жобаны уақтылы әрі сапалы жүзеге асыруға жан-жақты қолдау көрсетеді.
Жобада «Таза көмір» технологиясын қолданатын жаңа станция қарастырылған: электр қуаты – 360 МВт, жылу қуаты – сағатына 1000 Гкал. Қазіргі уақытта жер телімдері рәсімделіп, техникалық шарттар алынған, эскиздік жоба келісілген.
Қаладағы қолданыстағы жылу теңгеріміне келсек, тапшылық 147 Гкал/сағ деңгейінде. Бұл жаңа көпқабатты үйлер мен әлеуметтік нысандардың құрылысын тежеп, жаз айларында тұрғындардың ыстық сумен үздіксіз қамтылуына кедергі келтіріп отыр. ЖЭО-3 іске қосылғанда осы мәселелерді жүйелі түрде шешу күтіледі.
