Semeytany.kz — Семей қаласындағы №35 жалпы білім беретін мектепте заманауи «Абай кітапханасы» пайдалануға берілді. Жоба облыс әкімі Берік Уәлидің үндеуіне үн қосқан «Алматыкітап» баспасының құрылтайшысы Элеонора Баталова мен баспа президенті Гаухар Саймасаеваның қолдауымен жүзеге асты.
Ашылу рәсіміне Абай облысы білім басқармасының басшысы Бауыржан Ердембеков қатысып, Абайдың мұрасы жас ұрпақтың дүниетанымын кеңейтіп, елдік рухты күшейтуге қызмет ететінін атап өтті. Оның сөзінше, меценаттықты қолдау туралы Мемлекет басшысының Жолдауында айтылған бастамалар осындай игі істер арқылы нақты көрініс табуда.
Жаңа кеңістік 6,5 миллион теңгеге толық жабдықталды. Кітапхана қорында 60 мың дана еңбек бар: соның 30 мыңы — көркем әдебиет, қалғаны 1–11 сыныптарға арналған қазақ және орыс тіліндегі оқулықтар. Оқу орнына арнайы қойма, жайлы оқу аймақтары және интерактивті тақта орнатылған.
Іс-шара барысында мектеп оқушылары Абай шығармаларынан үзінділер оқып, кітапхана жұмысы ресми түрде басталды. Енді оқушыларға оқу мен ізденіс үшін қолайлы орта қалыптастырылды.
