3 қыркүйек – Тазы және төбет күніне орай «Әділет» партиясы Абай облыстық филиалының өкілдері Семей қаласында ұлттық құндылықтарды дәріптеп жүрген Сералы Құсманның шаңырағына арнайы барып, қазақтың тазыға деген дәстүрлі құрметі мен ұлттық тәрбиенің сабақтастығы жайында әңгімелесті.
Бұл кездесудің басты кейіпкері – Тауман есімді тазы. Ол 22 наурыз күні Сералы Құсманның босағасына келіп, содан бері осы шаңырақтың төрінен орын алған. Бес қысты көрген Тауман бүгінде жай ғана аңшылық иті емес, отбасының бір мүшесіне айналған. Сералы Құсманның айтуынша, қазақ үшін тазының орны әрдайым ерекше болған. Ол тазыны аңшылыққа пайдаланылатын ит қана емес, халықтың тұрмыс-тіршілігімен біте қайнасқан, қиын-қыстау кезеңдерде адамға серік болған жеті қазынаның бірі деп бағалайды.
«Қазақ тазыны бекерден-бекер төрге шығармаған. Тазы да, бүркіт те – елдің күнкөрісіне көмектескен серігі. Ашаршылық жылдарында аң аулап, тұтас ауылды асыраған тазы болған. Сондықтан оның қазақ үшін орны бөлек», – дейді Сералы Құсман.
Оның ерекше ықыласына бөленген Тауманның есімі де кездейсоқ қойылмаған. «Тауман» – «тау адамы» деген мағынаны білдіреді. Тазы бес қар басқан қысты өткерген, ал Сералы Құсманның шаңырағында биыл екінші қысын қарсы алып отыр.
«22 наурыз күні босағама келіп отырды. Содан бастап өзінің орны бар – төрде. Ақылына таңғаламын. Бүркіт екеуі қатар келген кезде бүркітке жол береді. Мұны ешкім үйреткен жоқ. Өзі біледі», – дейді ол.
Тауманның үйдегі орны да ерекше. Ұйықтаған кезде иесімен бір төсекке таласып қалатын көрінеді. Бұл оның шаңырақтың бір мүшесіне айналғанын көрсетеді. Қазақы түсінікте төр – ең құрметті орын. Сондықтан Тауманның төрден орын алуы тазыға деген дәстүрлі құрметтің бүгінгі күндегі жалғасын аңғартады.
Сералы Құсман ұлттық құндылықтарды дәріптеуді күнделікті өмірімен ұштастырып келеді. Ол Семейде он жылдан астам уақыт бойы «Сақ» моншасын дамытып, оны ұлттық дәстүр мен тәрбиені насихаттайтын ортаға айналдыруға мән беріп отыр. Бүгінде мұнда Қазақстанның әр өңірінен бөлек, Еуропа мен Қытайдан да қонақтар келеді.
Оның айтуынша, ұлттық идеологияны қалыптастыру үлкен ұрандардан емес, осындай қарапайым әрі өмірлік құндылықтардан басталады. Ұлттық дәстүрді көрсету, үлкенді құрметтеу, табиғат пен жануарға жанашырлық таныту, жас ұрпаққа қазақы дүниетанымды түсіндіру – тәрбиенің маңызды бөлігі.
Ұлттық мұраны сақтау мен оны кейінгі ұрпаққа жеткізу – қоғамның ортақ жауапкершілігі. Осы бағытта «Әділет» партиясы ұлттық құндылықтарды дәріптеу, тарихи-мәдени мұраны сақтау және жас ұрпаққа ұлттық тәрбие беру мәселелеріне ерекше мән береді. Партияның Әділет, Патриотизм, Жауапкершілік және Еңбек қағидаттары ұлттық құндылықтарды сөз жүзінде ғана емес, нақты іспен дәріптеуге үндейді. Ал Тауманның төрдегі орны, «Сақтағы» ұлттық тәрбиеге бағытталған бастамалар – атадан балаға жалғасқан дәстүрдің қазіргі қоғамдағы көрінісі. «Әділет» партиясы Абай облыстық филиалының баспасөз қызметі бөлімі
