Жексенбі күні Абай театрының сахнасында жаңа спектакльдің тұсаукесері өтті. Қойылымда қазақ халқының біртуар перзенті, ағартушы, ғалым, саяхатшы Шоқан Уәлихановтың өмірінің соңғы сәттері көрсетілді. Пьесадағы айтар ой басты кейіпкердің өзінің ішкі жан дүниесімен сырласуы, жақындарының, туыстарының, достарының бейнелерімен сұхбаттасуы арқылы берілді.
{jcomments on}Жерлесіміз, тарих ғылымдарының докторы, Л.Н.Гумилев атындағы Еуразия ұлттық университетінің ректоры Ерлан Сыдықов пен бішкектік режиссер Шамиль Джапаровтың қосавторлығымен жазылған драмалық қойылым ағымдағы жылы аталып өтетін Қазақ хандығының 550 жылдығы, Қазақстан халқы Ассамблеясының 20 жылдығы сияқты мерейтойлық даталарға арналған. Сонымен қатар биыл Шоқан Уәлихановтың туғанына 180 жыл толып отыр. Пьесаның сахналауына Достоевский және Абай атындағы театрлардың актерлері қатысты.
Бірактілі драманы тамашалау барысында көрермен айықпас сырқатқа душар болған бас кейіпкердің өзінің өміріндегі жақын адамдарының бейнелерімен диалогының куәсі болды. Ақтық демі таусылуға шақ қалған Шоқан жұртының адал перзенті ретінде тындырған істерін ой елегінен өткізіп, өз-өзіне есеп береді. Жасап кеткен дүниелері жайлы түрлі сұрақтар қойып, соларға жауап іздейді. Бірде өзінің жан дүниесіне үңіледі. Бірде көкейін-дегі ойларын әкесі Шыңғыстың, достары Достоевскийдің, Потаниннің бейнелерімен диалог барысында ақтарады.
Спектакль соңында қала әкімі аппаратының басшысы Шаған Жұмақсанов пен Шәкәрім атындағы мемлекеттік университетінінің Жоғары педагогика мектебінің директоры, профессор Арап Еспенбетов қойылымға қатысқан шығармашылық топқа көрермендер атынан алғыстарын айтты. Алдағы уақытта еңбектерінің табысты болуына тілектестіктерін жеткізді. Өз кезе-гінде қойылымның режиссері Шамиль Джапаров та драманы сахналауға қатысқан актерлерге алғысын білдіріп, барша халықты Қазақстанның өсіп-өркендеп, дамуына үлес қосуға шақырды.
Мирас ҚҰСАЙЫН,
«Семей таңы»
