Semeitany.kz – Жарма ауданының Суықбұлақ ауылында 100 орындық жаңа мектептің құрылысы белсенді жүріп жатыр.
1964 жылы балабақша ретінде салынған ескі ғимарат тозып, апатты деп танылғаннан кейін оқушылар бірнеше жылдан бері қолайсыз жағдайда білім алып келді: бастауыш сыныптар сол ескі ғимаратта оқыса, 5–11-сынып оқушылары көрші ауылға автобуспен қатынауға мәжбүр болды. Ауыл тұрғындары жаңа мектеп салу мәселесін 2011 жылдан бері көтеріп келген.
2025 жылғы 19 наурызда облыс әкімі Берік Уәли Жарма ауданына сапары барысында Суықбұлаққа арнайы келіп, жаңа білім ордасы бой көтеретінін мәлімдеді. Одан кейін, 2025 жылғы 18 маусымда нысанның іргетасы қаланды.
Жобаның мақсаты – ауылдағы білім беру инфрақұрылымын жаңартып, балаларға қауіпсіз әрі заманауи оқу жағдайын жасау. Қазіргі таңда құрылыс жұмыстары жоспарға сай жүргізілуде. Нысанды толық аяқтау 2026 жылдың сәуір айына жоспарланған.
