Semeytany.kz — Денсаулық сақтау министрлігі біржолғы зейнетақы төлемдерін емделу шығындарына пайдалану ережелерін жаңартуды ұсынды, деп хабарлайды редакция. Ұсынысқа сәйкес, зейнетақы жинақтарын мақсатсыз пайдалану фактілеріне байланысты тіс емдеу қызметтерін (протездеу, имплантация) зейнетақы жинағының «артық» бөлігінен төлеу тәртібін алып тастау қарастырылған.
Құжат біржолғы зейнетақы төлемдері арқылы көрсетілетін медициналық қызметтер тізбесін қайта қарауға бағытталған. Жоба «Ашық НҚА» порталында жарияланып, 30 қыркүйекке дейін көпшілік талқылауына ұсынылды.
Еске сала кетейік, бұған дейін Атырауда Бірыңғай жинақтаушы зейнетақы қорынан тіс емдеуге байланысты төлемдерді пайдалану арқылы 200 млрд теңге жымқырды деген күдікпен бір топ адам ұсталғаны хабарланған.
Ұсыныс қоғам талқылауынан өткен соң тиісті рәсімдер аяқталған жағдайда ғана күшіне енуі мүмкін. Министрлік медициналық қызметтер пакетін нақтылап, әлеуметтік маңызды бағыттарға басымдық беруді көздеп отыр.
