Semeytany.kz — Бүгін Семейдегі «Ес-Аймақ» рухани орталығында облыс әкімі Берік Уәли жергілікті бюджет есебінен бөлінген білім беру гранттарының иегерлерімен кездесті. Жиынға өңірдің жоғары оқу орындарының ректорлары, колледж және мектеп директорлары, басқарма басшылары мен студенттер қатысты.
Облыс әкімдігі биыл еңбек нарығында сұранысы жоғары 32 мамандық бойынша 200 грант қарастырды. Қаржы педагогика, экономика, техника және құрылыс, медицина, ауыл шаруашылығы және IT салаларына бағытталды. Биыл алғашқы рет «Журналистика» және «Стоматология» мамандықтарына да грант бөліп, жаңа кадр даярлауға жол ашылды. Өңір 200 грантпен республика бойынша алдыңғы алтылыққа енді. Бағдарлама 2023 жылдан бері жүзеге асып келеді.
Берік Уәли грант иегерлерін құттықтап, білімді жастардың елге қызмет етуі маңызды екенін атап өтті. Оның айтуынша, гранттарды бөлу кезінде оқу үлгерімі жоғары, пәндік олимпиада мен спорт жарыстарының жүлдегерлері, сондай-ақ аз қамтылған және көпбалалы отбасылардың балалары, ауыл мектептерінің түлектері басымдықпен қолдау тапты. «Әділетті қоғам құрудың бастауы — білім мен ғылым. Биыл әкім гранттарының әділ бөлінуін өзім қадағаладым», — деді аймақ басшысы.
Кездесуде студенттер де сөз сөйлеп, көрсетілген қолдау үшін алғыс білдірді. Семей медицина университетінің «Стоматология» мамандығында оқитын Жібек Теміржанова гранттың білімін тереңдетуге және алдағы мақсаттарына жетуге серпін бергенін айтып, алған білімді ел игілігіне жұмсауға уәде етті.
Қазір өңірдің үш ірі жоғары оқу орнында — Шәкәрім университеті, Alikhan Bokeikhan University және Семей медицина университетінде — 20 мыңға жуық студент білім алуда. Жергілікті гранттар жүйесі аудан-ауылдардағы кадр тапшылығын азайтып, өңір экономикасына қажет мамандарды даярлауға ықпал етпек.
