Өскемен қаласының прокуроры уақытша қызметінен шеттетілді. Қазіргі таңда қызметтік тексеріс жүріп жатыр.
«Шығыс Қазақстан облысының прокуратурасы әлеуметтік желілерде таралып жатқан Өскемен қаласы прокуратурасы қызметкерлеріне қатысты ақпарат бойынша келесіні хабарлайды. Өскемен қаласының прокурорына қатысты қызметтік тексеріс жүргізілуде. Қазақстан Республикасының «Құқық қорғау қызметі туралы» Заңына сәйкес, ол өзіне қатысты жауаптылық туралы шешім қабылданғанға дейін уақытша атқаратын лауазымынан шеттетілді»,–делінген хабарламада.
Өскемен қаласы прокуратурасының өзге қызметкерлеріне қатысты мәліметтер бойынша бұған дейін де қызметтік тексерістер жүргізілген. Аталған мән-жайлардың бір бөлігі расталып, көрсетілген қызметкерлер қызметтік әдеп нормаларын бұзғаны үшін тәртіптік жауаптылыққа тартылған.
Шығыс Қазақстан облысы прокуратурасының ресми деректеріне сәйкес, 2024 жылдың 7 маусымынан бастап Өскемен қаласының прокуроры қызметін Тимур Шақпантаев атқарып келеді. Ол 1987 жылы дүниеге келген. ҚАЕУ-ді заңгер мамандығы бойынша, ал С. Аманжолов атындағы жоғары оқу орнын экономист мамандығы бойынша бітірген. Еңбек жолын 2011 жылы Риддер қалалық прокуратурасында бастаған.
Тимур Шақпантаевтың әкесі Қайрат Шақпантаев Шығыс Қазақстан облыстық сотының төрағасы болған.
Еске салайық, бұған дейін мас күйде әуежайда шу шығарған ақтаулық прокурор Ерболат Әбдіров ұсақ бұзақылық жасағаны үшін кінәлі деп танылған болатын.
Дереккөзі: «Адырна» ұлттық порталы
