Қарғыба ауылындағы Ю.Гагарин атындағы орта мектепте мектебіміздің түлегі, «Қазақстан дауысы» жобасына қатысушы Ербол Нариманұлымен кездесу кеші болып өтті. Кешке оқушылар, ұстаздар қауымы қатысты.
{jcomments on}1991 жылы 31 қазанда Тарбағатай ауданының Қарғыба ауылында дүниеге келген Ербол мектебімізде білім алған соң Алматы қаласындағы Жүсіпбек Елебеков атындағы Эстрада-цирк колледжі және Астана қаласындағы Қазақ ұлттық өнер университетін бітірген. «Қазақстан дауысына» Алматы қаласында іріктеу кезінде 300 талапкердің арасынан өнерімен ерекшеленіп, көгілдір экран арқылы көрерменімен жүздескен Ерболға кеш барысында жерлестері әртүрлі сауалдар жолдады. Мақсаты жобаға қатысу арқылы қазақ эстрадасының әлемдік деңгейде дамуына үлес қосу екендігін айтқан өнерпаз:
— Жобаның екінші «Көрмей таңдау» кезеңінде «Япыр-ай» әнін орындадым. Маған тәлімгерім Алмас Кішкенбаев бұрылды. Егер төртеуі де бұрылса, Медеу Арынбаевты таңдар едім. Себебі ол кісінің стилі маған жақын,- деген ойымен бөлісті. Сонымен қатар әнші жігіт жобада жеңімпаз атанбаса да, өзге қатысушыларға сәттілік тілегенін жасырмады.
-«Қазақстан дауысы» арқылы халыққа біраз танылдым. Қазіргі таңда әндер жаздырып жатырмын. Болашақта бейнеклип түсірсем деген ойым бар,- деп, Ербол Нариманұлы болашақтағы жоспарларымен де бөлісті. Жырақта жүрсе де, туған жер ыстық екенін айтқан төл перзент кездесуді ұйымдастырған мектеп ұжымына, басшысы Ержан Ақылбековке алғыс айтты.
Т.НҰРҚАСЫМОВ,
Ю.Гагарин атындағы
орта мектеп тәлімгері.
