Semeitany.kz — Қарағанды облысында жолаушылар пойызы мен жеңіл көлік соқтығысып, үш адам оқиға орнында қаза тапты.
Оқиға 17 қыркүйек күні сағат 00:54-те Ақадыр – Қарағанды учаскесінің Жарық–Дария аралығындағы күзетілмейтін, реттелетін теміржол өткелінде болған. ҚТЖ баспасөз қызметінің мәліметінше, 92 км/сағ жылдамдықпен келе жатқан жолаушылар пойызының машинисі жолға шығып кеткен Mazda автокөлігіне байланысты шұғыл тежеу жасағанымен, соқтығысудың алдын алу мүмкін болмады.
Салдарынан автокөлік жүргізушісі мен екі жолаушы оқиға орнында қаза тапты. Оқиға туралы ақпарат құқық қорғау органдарына берілді.
«ҚТЖ «ҰК» АҚ марқұмдардың туыстары мен жақындарына көңіл айтады және барлық жол қатысушыларын теміржол өткелдеріндегі қозғалыс ережелерін қатаң сақтауға шақырады», – делінген хабарламада.
