Аудандық Мәдениет үйінде Қазақстан халқы Ассамблеясының 20 жылдығына арналған республикалық бірмезеттік іс—шара өткізілді. Шара аясында қолөнер, көркем өнер туындыларының озық үлгілері топтастырылған ауқымы кең көрме ұйымдастырылып, көпшілік назарына ұсынылды.
Кеш шымылдығы «Шаңырағың шайқалмасын десең, жеті жүкті көтере біл, бес шындықты мойындап әрекет қыл» атты Қазақстан халқы Ассамблеясының бас жиынында Президент атаған — тұрақтылық, экономика, тіл, дін, еңбек, мәдениет және тыныштық -туралы баяндалған бейнероликтен бастау алды. Ізінше әртүрлі ұлт өкілдерінің ұлттық киімдерін киіп әсерлі әуеннің ырғағымен қосыла қозғалған оқушылардың және аудан жастарының қатысуымен «Біз — Қазақстан халқымыз» атты флеш-моб көрсетіліп, көрермен тарапынан үлкен қолдауға ие болды. Ата салтымызды ардақтаған асыл әжелеріміз жиналған жұртшылық алдында шашуларын шашып, мерекенің мерейін арттырды.
{jcomments on}Бұл мерейлі жиында алғашқы құттықтау сөз аудан әкімінің орынбасары Е.Е.Рахметуллинге берілді. Өз сөзінде ол 28 ұлт өкілі тұратын аудандағы достық пен тұрақтылықтың, ынтымақ пен бірліктің қайнар көзіне айналған ошақтарды атап, аудан көлемінде атқарылған жұмыс барысына да тоқталып өтті. Бұдан кейін кезек марапатқа да келіп жетті. Қазақстан халқы Ассамблеясының татулық пен бірлікті ту еткен, үлгі етуге лайық ерлік іс тындырған азаматтарға тапсырылатын қоғамдық «Бірлік» жүлдесі облысымыз бойынша екі азаматқа табысталды. Бұл марапатқа ие болған аудандық мәслихаттың депутаты, жеке кәсіпкер В.Г.Харченко мен «Башкуль» татар мәдени бірлестігінің жетекшісі Р.Р.Хамитов сынды бесқарағайлық азаматтарға шара барысында құрмет көрсетілді. Сондай-ақ мереке аясында Қазақстан халқы Ассамблеясына 20 жыл толуына орай, ел бірлігін нығайту, бейбітшілік пен келісімді сақтау және рухани мәдениетті дамытуға қосқан елеулі үлестері үшін Шығыс Қазақстан облысы Қазақстан халқы Ассамблеясы хатшысы Е.М.Аязбаевтың және Бесқарағай ауданы әкімі Н.Б.Сыдықовтың Ал- ғыс хаттарымен аудандық «Асыл әжелер» фольклорлық тобы, Беген ауылдық округіндегі халық театрының ұжымы, «Деревенька моя» фольклорлық тобы, «Воскресение» фольклорлық тобы, Т.Ә.Боранғұлов, Э.Б.Сайферт, Т.Т.Тоқсеитов, О.Ф.Баймухамбетова, Д.А.Гусейнова марапатталды. Сол сияқты Қазақстан халқы Ассамблеясының 20 жылдығын мерекелеуге орай, қазақ тілінің мемлекеттік тіл ретінде мәртебесін көтеруге ерекше атсалысқан М.В.Тимохина және А.Р.Байрамова ШҚО Тілдерді дамыту жөніндегі басқармасының басшысының Алғыс хатымен мадақталды. Салтанатты түрде жүргізілген марапаттау рәсімі аяқталысымен, халық назары мерекелік бағдарламаға ауды. Сахна төріне шығып, өздерінің кішкентай болмыстарымен, балдай тәтті тілдерімен көрермен көңілін баураған Бейбарыс Рафаэльұлы және «Айналайын» балабақшасының тәрбиеленушілері мерейлі мерекеге дайындаған тартуларын жасады.
Мерекелік бағдарлама мұнымен шектелмеді. Кеш барысында Беген ауылдық округінің халық театры «Бір шаңырақ астында» атты қойылым арқылы қазақ халқының бойына біткен қасиеттерді айшықтап, дәртүрімізді ұлықтап, мәрттігімізді, жомарттығымызды айқын көрсете алды. Сонымен қатар осы күні «Асыл әжелер», «Воскресение», «Деревенька моя» фольклорлық топтарының және «Сымбат», «Экситон», «Чародей» би топтарының орындауларындағы, тағы өзге де әуезді әндер мен көңілді билер көрермен қолдауына ие болса, өз жадынан шыққан өлең жолдарын оқып, тыңдаушысына тағылымды ойын жеткізе білген жерлес ақындарымызды да көпшілік жылы қабылдады.
Ә. ЗАИТОВА,
Бесқарағай ауданы.
