Semeytany.kz – Абай облысының әкімі Берік Уәли халықаралық фестивальдерден бас жүлдемен оралған театр әртістерімен кездесіп, құрмет көрсетті.
Кездесу барысында аймақ басшысы өнер ұжымдарын кезекті жеңісімен құттықтап, Алғыс хат табыс етті. Ол бұл жетістік театрлардың кәсіби шеберлігі мен тынымсыз еңбегінің нәтижесі екенін атап өтті.
Семейдегі Абай атындағы қазақ музыкалық драма театрының құрамындағы «Дариға-ай» жастар театры Ұлытау облысы, Жезқазған қаласында өткен Жанат Хаджиев атындағы IV халықаралық театр фестивалінде Оралхан Бөкейдің «Өз отыңды өшірме» спектаклімен бас жүлде және «Үздік спектакль» номинациясын иеленді.
Ал Абай атындағы қазақ музыкалық драма театры Жетісу облысы, Талдықорған қаласында ұйымдастырылған Қазақ КСР-нің халық әртісі Бикен Римова атындағы «БИКЕН FEST» III халықаралық театр фестивалінде «Абай айтқан “Еңлік–Кебек”» қойылымымен бас жүлдені қанжығаға байлады.
Берік Уәли кездесуде Президент Қ.-Ж. Тоқаевтың Ұлттық құрылтайдағы «Семейде бір ғимаратта үш театр сығылысып отыр, аймақтарда театрларды салуға және дамытуға баса назар аудару керек» деген сөзін еске салып, жергілікті мәдениет саласын қолдау жалғасатынын айтты.
Айта кетейік, қазір облыстық бюджет есебінен театр ғимаратына ағымдағы жөндеу жүргізіліп жатыр. Театр ұжымы көрсетіліп келе жатқан қолдау үшін аймақ басшылығына алғыс білдірді.
