Өнердің қара шаңырағына айналған аудандық Мәдениет үйіне жиналған көрермен қауым 1975 жылы алғаш рет негізі қаланып, бүгінде талай белестерді бағындырған «Айнакөл» ансамблінің қырық жылдығына арналған мерекелік концертті тамашалады. Киелі Зайсан топырағында дүниеге келіп, ұлағатты өмірін табиғи талантының нәтижесінде өнермен өрнектеп, республиканы айтпағанда, Ресейде Мәскеудің және өзге де мемлекеттердің сахналарында талайды тамсандырған Ораз, Күлзипа Какеевтер, Қанағат Мұқанов, Қабимолда Байытов, Рысбек Жұмағалиев, Қазима Бықаева сияқты өмірден өткен сахна саңлақтарының суреттерін бейнекөріністерден көріп, өткен күндердің ұмытылмас сәттеріне куәгер болды. Еріксіз сағыныштан жанарға жас толды…
{jcomments on}Сағындырған сағым уақыттың жетегімен қырық жылды соңына қалдырған «Айнакөл» ансамблі қамал алар осы шаққа жеткенше көптеген тұғырдан көрінді. Дағдарыс кезеңіндегі қиындықты, нарықтық экономиканың жауапкершілігін арқалай жүріп, көрерменнің көзайымы бола білді. Есімі ел есінде мәңгілікке сақталған Ораз ағамыз сияқты күміс көмей әншілердің ізбасарлары атанған шәкірттері тамылжыта шырқағанда, «Орнында бар оңалар» деген сөз тіркесі еске оралғаны да шындық.
Киелі сахна төріне шыққан Шығыс Қазақстан облысының мәдениет, мұрағаттар және құжаттама басқармасы басшысының орынбасары Нұрмұханова Раушан Қапасқызы киім тіктіруге 300 мың теңгенің сертификатын тапсырды. Зайсан ауданының әкімі Алмас Оңдақанов пен аудандық мәслихат хатшысы Дәулет Ыдырышев «Айнакөл» ансамблінің ұжымын 40 жылдық мерейтойымен құттықтады. Ансамбльдің жетекшісі Мұратхан Донбаевқа құттықтау хаттары мен материалдық базасын нығайтуға 300 мың теңгенің сертификатын тапсырды. Ансамбльдің зейнеткер-лікке шыққан еңбек ардагерлері мен мүшелері аудан әкімі мен аудандық мәслихаттың Алғыс хатымен, ақшалай және бағалы сыйлықтармен марапатталды.
Бұл күні көрермен көз жазып қалған сүйікті әншілері мен бишілері Жаңылсын Талғарбекова, Райхана Тергенбаева, Райса Елеуованың өнеріне ыстық ықылас танытып, қолдау көрсетсе, сексеннің сеңгіріне қадам басқан Ильхам Ниғыметжанов, кезінде «Айнакөл» әнінің алғашқы орындаушысы болған Совет Салиев сияқты мәдениет саласының ардагер тарландары сахна сәнін келтіргендей әсерде қалдырды. Есімі еліне танымал актер Жексен Тоқтасынов бастаған топтың сомдаған қазақ хандарының бейнесі көрермен қауымды ұлттық тарихымыздың шежірелі беттерін парақтағандай күйге бөледі. Аудандық Мәдениет үйінің халық театрының режиссері, Қазақстан Республикасы «Мәдениет саласының үздігі» төсбелгісінің иегері Алма Сүлейменованың ұйымдастыруымен бейнеленген «Көш керуен» көрінісі де өткен тарихтың шежірелі беттерінен сыр шерткендей болды. «Шығыстың қос жұлдызы» әнін Майгүл Мұжанова тамылжыта шырқаған кездегі сахналық қойылым да сұрапыл кезеңнің ұмытылмас сәтін еске түсірді.
Ансамбльдің көркемдік жетекшісі Мұратхан Донбаев бастаған өнер иелері «Айнакөлдің» атына заты сай деңгейден көрінуіне шығармашылық ізденіспен тер төгіп жүргенін осынау мерейлі сәтте атап айтқанды жөн көрдік. Мұрат Далабаев, Жолшыбайхан Дуанханов, Ақыл Солтанов,Талғат Мамырбаев, Анар Домбаева, Майгүл Мұжанова, Бикен Жабашева, Мөлдір Ысқақова сияқты көптеген өнер иелерінің есімі жерлестерінің арасында әркез құрметпен аталады. Көрермендер тарапынан солардың өнеріне қошеметпен қол соғылатыны өнер иелерінің әрқайсысына көрсетілген ілтипат екені шындық. Мерекелік концертке келген жеке кәсіпкерлер Г.Шерубаева, Ж.Абызбаева, Толыбаева ансамбльдің мерейлі сәтіне арнаған шашуларын сыйға тартты.
Ардақты БӨЛДЕКБАЕВА,
«Семей таңы»
