Semeytany.kz – Петропавлда ұйымдасқан қылмыспен күрес басқармасының бұрынғы орынбасары, 36 жастағы Ерболат Қаптаев қылмыстық топқа қолдау көрсетіп, пара алғаны үшін 8 жылға бас бостандығынан айырылды.
Сот материалдарына сай, Қаптаев рецидивист Руслан Нағұмановпен қызметтік шеңберден тыс байланыста болған. Тергеу нұсқасы бойынша, Нағұманов полицейдің мейрамханадағы есептерін төлеп, көлік пайдалануына жағдай жасап, қымбат телефон сыйлаған. Ал Қаптаев өз кезегінде тінту шаралары туралы алдын ала ескертіп, жауапкершіліктен жалтаруына көмектескені айтылады.
Үкім шығару кезінде куәгерлердің айғақтары, телефон қоңырауларының жазбалары, хат алмасулар және жасырын тергеу әрекеттерінің нәтижелері ескерілген. Қаптаев кінәсін мойындамай, байланыс тек қызметтік сипатта болды деп мәлімдегенімен, сот айыптауды негізді деп тапты.
Еске салайық, 2024 жылдың қыркүйегінде Руслан Нағұманов алаяқтық және бұзақылық үшін 7 жылға сотталған. Дәл сол кезеңде Қаптаев ішкі істер органдарынан кеткен, ал 2024 жылдың қарашасында қамауға алынған. Тараптар заңда белгіленген тәртіппен үкімге шағым түсіре алады.
