Semeytany.kz — Қала күніне орай Абай облысының әкімі Берік Уәли семейліктерді құттықтап, Семейдің тарихи мәртебесін және соңғы уақыттағы өзгерістерді атап өтті. Әкімнің айтуынша, Семей – ұлы Абайдан бастау алған қазақ ренессансының ізі сайраған, тұңғыштар мекені санатындағы қастерлі шаһар.
Қала инфрақұрылымын жаңарту бойынша бірқатар жұмыс жүзеге асырылды: ескі және жаңа көпірлердің асфальт жабыны толықтай жаңартылды, 52 көшеде орташа жөндеу жүргізіліп, соның 36-сына алғаш рет асфальт төселді. 35 аула абаттандырылып, тұрғындардың игілігіне берілді. Қоғамдық көлік сапасын арттыру мақсатында жаңа автобустар сатып алынды.
«Мұның барлығы – қала тұрғындарының игілігі үшін жасалып жатқан нақты істер. Бұл бағыттағы жұмыстар жүйелі түрде жалғасады. Алдағы уақытта Семейіміз серпіліп, жасарып, жаңарып, қарқынды даму жолына түсетініне сенімдімін», – деді Берік Уәли.
