Күніне қырық құбылған қазіргі заманда дүниежүзі алдыңғы экономикалық күйзелістің салдарынан арылып, еңсесін тіктей бастағанда жаңа дағдарыстың толқынына тап болды. Бұл жайт біздің халықаралық интеграциялық үрдістердің белсенді қатысушысына айналған, әлем мемлекеттерімен тығыз байланыс орнатып келе жатқан елімізді айналып өтпесі әмбеге аян. Елбасы өзінің «Нұрлы жол – болашаққа бастар жол» атты Жолдауында бұл дағдарысқа қарсы күрестің нақты жоспарын көрсетіп берді. Хош. Қиыншылықты еңсеруге жол ашатын жұмыстардың бағдары белгіленіп, бағыты айқындалды. Енді не қажет? Осы орайда еліміздің тұрақты дамуының тіректері саналатын этносаралық татулық пен бірлікті насихаттауда, нығайтуда ерекше рөл атқарып келе жатқан бірегей қоғамдық институт — Қазақстан халқы Ассамблеясы кеңесінің мүшелері, міне, арнайы ұсыныс білдірді.
{jcomments on}“Қазақстан халқы Ассамблеясына Қазақстан Республикасы Президентінің сайлауын мерзімінен бұрын өткізу туралы бастама көтеріп, еліміздің барлық өңірлерінен көптеген азаматтар хабарласуда. Қазақстан халқы Ассамблеясы осы маңызды мәселе бойынша ұстанымын білдіруді өзінің азаматтық борышы деп санайды. Әлемдік экономикалық дағдарыс пен күрделі халықаралық жағдай орын алып отырған тұста, сайлау өткізу туралы жалпыхалықтық бастаманың көтерілуі уақыт талабы болып табылады. Жаһандық сын-қатерлер кезеңінде еліміздің Президенті Нұрсұлтан Назарбаевқа Қазақстанды дағдарыстан алып шығуына мүмкіндік беретін жаңа сенім мандаты берілуі қажет”,- делінген үндеуде. Өз сөздерінде Қазақстан халқы Ассамблеясы Кеңесінің мүшелері жер жүзінде тұрақсыздық орын алып жатқан жаңа әрі күрделі шақта еліміз стратегиялық бағытынан танбай, Қазақстанды жаңғырту және жаһанның озық 30 елінің санатына кіру үшін, Ұлт Көшбасшысына сенім білдірудің қаншалық мәнге ие екендігін де атап өтті. Ұсыныстың жүзеге асырылуының, яғни Елбасыға сенім мандатын тапсыруды дүниежүзілік дамудың жаңа кезеңінде мемлекетіміздің өркендеуі жолындағы маңызды мәселелерге баса назар аударуға мүмкіндік алатынымызды тілге тиек етіп, ойларын дәйекті түрде негіздеп жеткізді. Естіп-білген ақпараттардың, ел аумағындағы ахуалға қатысты өзіме таныс мағлұматтардың барлығын ой елегінен өткізіп алып, осынау бастаманы қолдайтынымды айтқым келеді.
Айман БОКБАСАРОВА,
«Айша Бибі» қазақ мәдени
орталығының төрайымы.
