Semeytany.kz — Қазақстан Президенті Қасым-Жомарт Тоқаев БҰҰ Бас Ассамблеясының 80-сессиясындағы жалпы дебатта (Нью-Йорк, 23 қыркүйек) жаһандық тұрақсыздық жағдайында Біріккен Ұлттар Ұйымының рөлін күшейтіп, оны құбылмалы дәуірге бейімдеу қажеттігін айтты. Мемлекет басшысы көпжақты институттарға деген сенім дағдарысын еңсеру үшін барша елдер бірлесе әрекет етуі тиіс екенін атап өтті.
Тоқаевтың айтуынша, халықаралық құқықты өрескел бұзу «қалыптыға» айналып, мемлекеттер арасындағы өзара сенім әлсіреген. «Осындай алмағайып кезеңде бәріміз БҰҰ позициясының нығаюына ықпал етіп, соғыс отын тұтатудан гөрі өзара түсіністік пен ынтымақтастықты алға шығаруға міндеттіміз», — деді ол.
Президент БҰҰ-ны кешенді жаңғырту – «ойланып жүретін тақырып емес, стратегиялық қажеттілік» екенін айтып, реформаның өзегі ретінде Қауіпсіздік Кеңесін жаңарту мәселесін көтерді. Сондай-ақ ол бейбітшілік, орнықты даму және ядролық қаруды таратпау күн тәртібінің өзектілігін қайта растады. «Қазіргі буын көшбасшылары әрекетсіз отыра алмайды, оның зардабын келесі ұрпақ тартады», — деді Тоқаев.
Президенттің сөзі Біріккен Ұлттар Ұйымының Бас Ассамблеясының ресми алаңында жарияланды. Отырыстың видеожазбасы мен мәтіні халықаралық платформаларда қолжетімді.
