Semeytany.kz — Курчатов қаласында алдағы жылу беру маусымына дайындық толық аяқталды. Бұл туралы Өңірлік коммуникациялар қызметінде өткен баспасөз мәслихатында қала әкімі Болат Абдралиев мәлімдеді.
Әкімнің айтуынша, жылу жүйелері тексеріліп, әлсіз учаскелердегі құбырлар ауыстырылған, қысыммен сынақтан өткізілген. Қазандықтарда қажетті жөндеу жүргізіліп, отын қоры нормативке сай толықтырылған. «Қазір Курчатов 100 пайыз жылыту маусымына дайын. Өткен жылмен салыстырғанда жағдай едәуір жақсарды», — деді Болат Абдралиев.
Оның сөзіне сенсек, пәтер ішіндегі радиаторлар мен үйішілік құбырларға да көңіл бөлінген. Тұрғындармен кездесулер өтіп, түсіндіру жұмыстары жасалғаннан кейін былтырдан бері үйішілік ақаулар реттеліп, шағымдар азайған.
Қала әкімдігі үш қазандықтағы сегіз қазан агрегатын жаңартуды да жоспарлап отыр. Олар резерв мақсатында қарастырылып, аномальды төмен температура кезінде ғана қосылады. Жалпы, тұрғын үйлер мен қазандықтар жоспарға сай жылу беруді уақытылы бастауға әзір.
Әкімдік желілерді, қазандықтарды және үйішілік жүйелерді уақтылы жөндеу арқылы қыс бойы тұрақты температураны сақтауға мүмкіндік берілетінін атап өтті.
