Абай облысында «AMANAT» партиясы жанындағы «Жастар рухы» Жастар қанатының, Семей қаласының спорт бөлімінің ұйымдастыруымен және облыстық мәслихат депутаты Қайырлы Қасеновтың қолдауымен ерекше спорттық іс-шара өткізілді. «Чемпиондық рух» деп аталатын бұл жоба аясында өткен таңғы жаттығу мен шеберлік сағаты жергілікті тұрғындарды салауатты өмір салтына шақырып, жастардың белсенділігін арттыруға бағытталған. Аталған «Баршаға арналған спорт» таңғы жаттығулар жобасының жетекшісі Бақытжан Қанапиянов.
Арбат алаңында өткен спорттық басқосуға 150-ге жуық жас қатысты. Шараға «AMANAT» партиясы Абай облыстық филиалының төрағасы Айдар Садырбаев, пауэрлифтингтен әлем чемпионы, Семей қалалық мәслихатының депутаты Андрей Алтайбаев және белгілі спортшылар қатысып, өздерінің жастарға деген қолдауларын білдіріп, сөз сөйледі. Шара барысында спортсүйер қауымға каратэден спорттық көрсетілімдер, ұлдар мен қыздар арасындағы түрлі спорттық жарыстар, қызықты байқаулар мен музыкалық нөмірлер ұсынылды. Сонымен қатар, әлеуметтік үндеулерге қосылып, жастарды белсенді азаматтық ұстанымға шақыратын бастамалар да айтылды.
– «Чемпиондық рух» жобасы – жастарға салауатты өмір салтын насихаттаумен қатар, олардың бойындағы қайсарлық пен отансүйгіштікті нығайтуға бағытталған бастама. Мұндай іс-шаралар ел болашағы – жастардың тұлғалық дамуына зор серпін береді, – деді «Абай облысы Семей қаласының дене шынықтыру және спорт бөлімі» ММ басшысы Қуат Исажанов. Сондай-ақ, пауэрлифтингтен әлем чемпионы Андрей Алтайбаев өз тәжірибесімен бөлісіп, спорттың адам өміріндегі орнына тоқталды.
— Жастардың спортқа қызығушылығы артып келеді. Дәл осындай іс-шараларды ұйымдастыра отырып, біз бүгінгі спорттың дамуына өз үлесімізді қоса аламыз. Және де салауатты өмір салтын ұстанудың нақты қағидаларын да жастарға жеткізіп, олардың бойына рух береміз. Чемпиондық Рух – білім мен ерік-жігерге негізделген күш, еліміздің әр өңіріндегі мыңдаған жастың бойына тәртіп пен тәрбие, спорт пен сана, рух пен парасат ұялататын бірегей жоба. «Чемпиондық Рух» жобасы еліміздің барлық аймақтарында «Жастар Рухы» Жастар қанатының ұйымдастыруымен ауқымды кешенді жоспар аясында түрлі шаралармен тұрақты негізде жалғасын табуда. Сол үшін де ұйымдастырушыларға деген алғысымыз шексіз, — деді ол.
Ұйымдастырушылардың айтуынша, мұндай жобалар өңір жастарының спортқа деген ынтасын арттыруға, жаңа спорттық бағыттарды дамытуға жол ашады. «Жастар рухы» алдағы уақытта да спорттық акциялар мен әлеуметтік бастамаларды тұрақты түрде өткізуді жоспарлап отырғанын жеткізді.
