Semeytany.kz — Абай облысының әкімі Берік Уәли Мақаншы ауданының халқымен кездесті. Жиында өңірдің әлеуметтік-экономикалық дамуы, өзекті мәселелер және алдағы жоспарлар айтылды.
Алдымен аудан әкімі Дәурен Қойгелдин 2024–2025 жылдарға қатысты негізгі көрсеткіштерді баяндады. Биылғы 8 ай қорытындысы бойынша облыс экономикасында оң динамика сақталды: көлік саласында – 122,5%, құрылыс – 120,8%, ішкі сауда – 107,4%, ауыл шаруашылығы – 102,9%, өңдеу өнеркәсібі – 101,2%.
Ауыл шаруашылығында Мақаншының үлесі айрықша. Егіс алқабы 64,5 мың гектарды құрайды. «Кең дала – 2» бағдарламасы арқылы шаруалар 393 млн теңге несие алды, техника паркі 9 жаңа бірлікпен толықты. Жалпы құны 21 млрд теңгені қамтитын төрт инвестициялық жоба жоспарланған. Бұған қоса, құны 15 млрд теңге болатын, 228 жұмыс орнын ашуға негізделген үш жоба жүзеге асуда.
Әлеуметтік салада биыл 118 пәтер пайдалануға берілмек. 14 мектеп пен Балалар шығармашылығы үйі жөндеуден өтті, бірқатар білім ошағына жаңа пәндік кабинеттер мен автобус сатып алынды. Аудандық аурухана күрделі жөндеуден өтіп, заманауи медициналық техникамен жабдықталады. 1991 жылдан бері аяқталмай тұрған дәрігерлік амбулатория жыл соңына дейін іске қосылады.
Инженерлік инфрақұрылым жаңартылып жатыр: Қабанбай және Бекет ауылдарында ауызсу жобалары биыл тәмамдалады. Мақаншы мен Көкталдың көшелері жарықтандырылуда, аудан орталығындағы Арбат пен Жеңіс саябағы абаттандырылуда. Жол жөндеу жұмыстары жүргізілуде. Алакөл жағалауын дамытуға облыстық бюджеттен 659 млн теңге бөлінді.
Мәдениет және спорт саласы да назарда. Қарабұлақ ауылында спорт модулі салынып жатыр. Аудандық Мәдениет үйінің «Інжу-Маржан» ансамбліне музыкалық аспаптар алынды, Балалар спорт мектебінің материалдық-техникалық базасы күшейтілуде.
Кездесу соңында аймақ басшысы тұрғындардың ұсыныс-пікірлерін тыңдап, сұрақтарына жауап берді. «Жарты жылдан астам уақытта атқарылған жұмысқа есеп беріп, алдағы жоспарлармен бөлісу үшін келдік. Алакөлді айнала қонған ағайынның түйткілді мәселелерін білеміз. Барлық өзекті мәселе кезең-кезеңімен шешіледі», – деді Берік Уәли.
