Semeytany.kz — Облыс әкімі Берік Уәли Ресейдің Барнауыл қаласында өткен құдалықта қазақы салт-дәстүрді дәріптеген семейлік азаматтар – Гринев, Неклюдов және Жаймұхамедовтар отбасымен кездесті.
Кездесуде аймақ басшысы жерлестердің шапан, тақия секілді ұлттық киім киіп, шашу шашып, береке-бірліктің үлгісін көрсеткенін атап өтіп, бұл әрекет ел ішіндегі татулық пен достыққа қызмет ететінін айтты. Әлеуметтік желіге жарияланған бейнежазба көпшіліктен жылы пікір жинаған.
Күйеу жігіттің әжесі, зейнеткер Галина Неклюдова құдалыққа арнайы дайындалмағандарын, бірақ Қазақстаннан барғанын, ұлттық дәстүрді танытуды мақсат тұтқанын жеткізді. Ол мемлекеттік Туға айрықша құрмет көрсетілгенін, жаңа туыстарға туған елдің құндылықтарын таныстыруды көздегенін айтты.
Барнауылда қазақы дәстүрді насихаттаған азаматтарға Қазақстан халқы Ассамблеясы төрағасының орынбасары Марат Әзілханов пен облыс әкімі атынан Алғыс хаттар табысталды.
Бүгінде өңірімізде 50-ден астам этнос өкілі тату өмір сүріп жатыр. Облыстағы 5 Достық үйі мен 46 этномәдени бірлестік ынтымақ пен берекені нығайтуға үлес қосуда.
