Киокушинкай каратэ спорт түрі бойынша Астана қаласында өткен VІІІ халықаралық ТМД кубогіне қатысқан семейлік спортшылар бұл жарыстан олжалы оралды.
{jcomments on}Астана мен Алматы қалаларынан, еліміздің әр аймағынан және алыс-жақын шетелдерден 6 жастан 18 жасқа дейін, жалпы, 400-ге жуық спортшы қатысқан. Ал бұл байрақты бәсекеде Семейдің 50 спортшысы бақтарын сынаған екен. Соның алтауы жүлделі орынға ие болған. Жарыс барысында 55 келі салмақ дәрежесі бойынша ересектер арасында өнер көрсетіп, жекпе-жектің үшеуінде де қарсыластарынан басым түскен жерлесіміз Мұхаметәли Дүйсенғазин І орынды қанжығаға байлап, алтыннан алқа таққан.
Жеңімпаз ұлды әкесі Кенжебек Тырнақбаев пен ағасы Толқын Тырнақбаев бастаған топ жексенбі күні теміржол бекетінен құшақ жая қарсы алды. Байрақты бәсекеде балаларының бағы жанғаны үшін, әрине, тақымын қысып тілеуін тілеген ата-ананың қуанышында шек жоқ. Кенжебек Дүйсенғазыұлы мен Мархабат Мәмиқызы қос құлыны Мұхаметәли мен Аяулымға тағылымды тәрбие беруде. Балаларының болашағынан зор үміт күтетіндіктерін айтады олар.
— Жекпе-жек алаңындағы бірінші қарсыласым астаналық спортшы болды. Екінші кезекте Зырян қаласының каратэшісімен, ал үшінші кезекте маңғыстаулық каратэшімен кездестік. Қарсыластарымның ішіндегі ең мықтысы деп зыряндық спортшыны айтуға болады, — дейді М.Дүйсенғазин.
Айта кету керек, аталмыш жарыста Семейдегі «Барыс» спорт клубының бапкері Ерік Дәулетқалиевтің, Мұхаметәли Дүйсенғазиннен басқа, Жәнібек Пышақбаев, Батырхан Бояубаев сынды шәкірттері ІІ, ІІІ орындарды еншілеген.
Ал Мұхаметәлидің каратэмен айналысып жүргеніне 10 жылдай уақыт болыпты. Бұл уақыт ішінде арынды ұл біршама жетістіктерге қол жеткізген. Қалалық, облыстық, республикалық және халықаралық жарыстардың жеңімпазы атанып, 20 шақты медальмен, 5-6 кубокпен және көптеген дипломдармен, мақтау қағаздарымен марапаттал-ған. Бүгінде спорт шеберлігіне үміткер, қоңыр белбеу иегері атанған Мұхаметәли қаладағы колледждердің бірінде дене тәрбиесі пәні мұғалімі мамандығы бойынша білім алуда. Болашақта өзінің жеке спорт мектебін ашуды армандайтын жалынды жігіт мақсатына жету үшін әлі талай тер төгу керек екенін жақсы біледі, ол үшін аянып та қалмақ емес. Мейлінше жаттығудан да әсте қол үзбейтін көрінеді. Ыңғайы келсе, күніне 4-5 сағат уақытын жаттығуға жұмсайды екен. Сұхбат барысында Мұхаметәли алдағы наурыз айында өтетін ел чемпионаты мен мамыр айында Германияның астанасы Берлин қаласында өтетін әлем чемпионатына қатысу жоспарында бар екенін айтып өтті. Еліміздің және қаламыздың намысын қорғайтын спорт сәйгүлігіне дүбірлі додаларда, лайым, асығы алшысынан түсіп, еліміздің көк туын тек биікте желбірете берсін деген тілек білдіреміз.
Нұрдәулет КӘКІШЕВ,
«Семей таңы»
