Semeytany.kz — Мемлекет басшысы Қасым-Жомарт Тоқаев New Silk Way VII халықаралық көлік-логистика бизнес-форумының ашылуында «Достық – Мойынты» теміржолының екінші желісін ресми іске қосты.
Президент форумның маңызын атап өтіп, бұл бағыттың Қазақстанның көлік-логистика жүйесін жаңғыртып, тиімділігін арттыруға қуатты ықпал ететінін айтты. Ол «Достық – Мойынты» жолын еліміздің транзиттік әлеуетін күшейтетін стратегиялық инфрақұрылым жобасы деп бағалады. Сондай-ақ, 35 жыл бұрын іске қосылған «Достық – Алашаңқай» жобасын еске алып, осы магистральды салуға атсалысқан ардагерлерге алғыс білдірді.
Мемлекет басшысы Қытаймен жан-жақты серіктестіктің берік негізіне тоқталып, «Бір белдеу, бір жол» бастамасының Қазақстан мүддесіне толық сай келетінін және біздің ел бұл жобаны жүзеге асыруға белсенді қатысып отырғанын айтты. Оның сөзінше, Ұлы Жібек жолының тарихи дәстүрі мен қазіргі жаһандық байланыстар жүйесі тоғысқан тұста «Достық – Мойынты» желісінің екінші тармағы Қытай мен Еуропа арасындағы жүк ағынын тиімді өткізуге мүмкіндік береді.
Жаңадан қосылған желі теміржол қимылын жеңілдетіп, өткізу қабілетін ұлғайтуға, мультимодальды бағыттарды дамытуға және халықаралық дәліздердегі тұрақтылықты күшейтуге қызмет етпек. Форум алаңында осы инфрақұрылымның экспорт-импорт пен транзиттік тасымалдарға қосымша мүмкіндік беретіні атап өтілді.
