Semeytany.kz — Қазақстанда 100 жастағы және одан үлкен 448 азамат тіркелген. Ең қарт тұрғын Ұлытау облысында тұрады: ол жақында 115 жасқа толды, деп мәлімдеді ҚР Еңбек және халықты әлеуметтік қорғау министрлігі.
Министрліктің дерегінше, ғасыр жасағандардың ең көбі Алматы қаласында – 58 адам. Ұзақ ғұмыр иелері бойынша келесі орында Түркістан облысы (53 адам), үшінші орында Алматы облысы (37 адам). Ең қарттардың үштігі: Ұлытау облысы – 115 жас, Павлодар облысы – 113 жас, Жамбыл облысы – 110 жас.
Айта кетейік, жыл сайын 1 қазанда әлем елдерімен бірге Қазақстанда да Халықаралық қарттар күні аталып өтеді. Бұл мереке 1990 жылғы 14 желтоқсанда БҰҰ Бас Ассамблеясының 45-сессиясында бекітілген. Мақсаты – егде жастағы адамдардың қоғам мен мемлекетке сіңірген еңбегін құрметтеу, олардың қажеттіліктеріне назар аудару және өмір сапасын арттыруға ықпал ету.
