Semeytany.kz — Бесқарағай ауданында туризм инфрақұрылымы кеңейіп, жаңа демалыс орындары ашылуда. Бұл туралы өңірлік коммуникациялар қызметіндегі баспасөз мәслихатында аудан әкімі Нұрбек Қошқарбаев мәлімдеді.
Әкімнің айтуынша, ауданда қазіргі таңда 2 қонақүй, «Елімай» демалыс базасы және 3 мектеп жанындағы жазғы лагерь жұмыс істейді. Өткен жылы ішкі туризм аясында 922 қонақ қабылданған. «Семей орманы» табиғи резерваты аумағында жыл сайын 5 мыңнан астам адам баратын «Демалыс бұрышы» ұйымдастырылған. 2016 жылдан бері Глуховка ауылдық округіндегі «Елімай» табысты қызмет етіп келеді. Биыл Канонерка ауылдық округінде «Zhylandy Eco Village» демалыс орны іске қосылып, келешекте мейрамхана мен бассейн салу жоспарланып отыр, – деді Нұрбек Қошқарбаев.
Экотуризм мен балық шаруашылығын қатар дамыту бағытында Старая Крепость ауылында «Маклаков Наиль» жеке кәсіпкерлігі 100 тоннаға дейін өнім беретін балық өсіру-демалыс базасын ашты. Мұнда кемпірқосақ форелі, сібір бекіресі, сазан және тұқы өсірілетін алты жасанды тоған бар. Келушілерге арналған 80 орындық төрт кешен салынған, алдағы уақытта мейрамхана іске қосылады.
Глуховка ауылдық округінде «Шаңырақ» спорттық-сауықтыру кешені де пайдалануға берілуде. Кешен аумағында қонақүй, коттедждер, киіз үй пішініндегі мейрамхана, бассейн, футбол алаңы және жазғы беседкалар қарастырылған.
Ауданның туристік әлеуеті табиғи байлыққа негізделген: қайталанбас қарағайлы орман, Ертіс өзені және халық арасында емдік қасиетімен танымал «Шипалы» көлі орналасқан. Биыл облыс әкімі Берік Уәліұлының қолдауымен аталған көлге электр энергиясын тарту жобасы мақұлданып, облыстың инвестициялық жобалар тізіміне енді.
Ағымдағы жылы «Aisua Trade» ЖШС «Шипалы» көлінің жағасында заманауи шипажай салуды жоспарлап отыр. Жоба шеңберінде 180 орындық қонақүй кешені, жайлы коттедждер, мейрамхана, монша және демалушыларға арналған өзге де инфрақұрылым бой көтермек. Осы бастамалар жүзеге асқан соң, Бесқарағай ауданы ішкі туризм картасындағы тартымды бағыттардың біріне айналуы күтіледі.
