Ақпанның он сегізі күні Кеңес Одағының Батыры Әлия Молдағұлованың құрметіне арнайы еске алу күні өткізілді. Шара аясында Қазақ инновациялық гуманитарлық—заң университетінде салтанатты кеш ұйымдастырылды. Жиынға студенттермен бірге, соғыс және Қазақстан Республикасының Қарулы күштерінің ардагерлері қатысты.
{jcomments on}Шараны өткізудегі негізгі мақсат – өскелең ұрпаққа соғыс кезінде елін, жерін қорғаған батырларымыз туралы ақпар беру, жастарды патриоттық рухта тәрбиелеу. Майдан даласында ерен ерлік көрсеткен Әлия Молдағұлованы еске алу күні аясында Қазақ инновациялық гуманитарлық-заң университетінің студенттері Жеңіс саябағында бір минуттық үнсіздік жариялап, мәңгілік алауға гүл шоқтарын қойып, тағзым етті. Соғыс және Қазақстан Республикасының Қарулы күштерінің ардагерлері, студенттер қатысқан салтанатты жиын барысында Қазақ халқының батыр қызы туралы, соғысқа аттанған кезі жайлы мәліметтер берілген деректі фильм көрсетілді. Әлия Молдағұлованың есімі бұл күнде Отанға деген адалдық пен туған елге деген сүйіспеншіліктің символы іспеттес. Ол 1925 жылы Ақтөбе облысы Қобда ауданы Бұлақ ауылында дүниеге келді. 1935 жылдан бастап Ленинград қаласындағы балалар үйінің бірінде тәрбиеленіп білім алған. Соғыс басталған кезде, алғашқылардың бірі болып, майданға аттануға ниет білдірген. 1942 жылы бірнеше мәрте өтініш жазғаннан кейін мергендер дайындайтын мектепке қабылданды. Оқуын үздік бағаға бітірген қайсар қыз, сол мектепте нұсқаушы болып қалуға ұсыныс жасалғанына қарамастан, әскер қатарына қосуға өтініш білдірген. Майдан шебінде ұрыстар кезінде ол талай мәрте ерлігімен танылып, жүзден астам жау сарбаздары мен офицерлерінің көзін жойған. Бірнеше мәрте шайқастар барысында қаруластарын шабуылға бастап шықты. 1944 жылы қаңтардың он төрті күні Калинин облысы Казачиха ауылы үшін болған ұрыс кезінде қаза тапты. Майдан шебінде көрсеткен ерлігі үшін Әлия Молдағұлова Кеңес Одағының батыры атағын иеленді.
Сондай-ақ жиын барысында Әлия Молдағұлованың көрсеткен ерліктері хақында сыр шертетін «Мергендер» көркем фильмінен үзінділер көрсетілді. Жиналғандар назарына арнайы концерттік бағдарлама ұсынылды. Патриоттық тақырыптағы және Жеңіс туралы әндер орындалып, өлеңдер оқылды.
Мирас ҚҰСАЙЫН,
«Семей таңы»
