Үкіметтің кеңейтілген отырысында Мемлекет басшысы Н.Назарбаев Қазақстан экономикасында дағдарыс жоқ екенін, ел экономикасының тамыры терең, iргесi мығым, қоры – жеткiлiктi екенін атап өтті. Сонымен қатар «Нұрлы жол» бағдарламасы — бұл дағдарысқа қарсы шара. Мен дәл осы жылы қиындықтар болатындығын айтқанмын. Біз алдын орап, осы бағдарламаны қабылдадық. Ол қиын жағдайда экономикамыздың өсім және біздің азаматтарымыз үшін жұмыс орындарын құру нүктесі болып табылады», — деп Елбасымыз даму жолымызды атап көрсетті. Бюджет шығыстарын оңтайландыруды дағдарысқа қарсы шаралардың негізгі элементтерінің бірі ретінде атап өтті.
{jcomments on}«Басталған жобаларды аяғына дейін жеткізіп, жаңа бастамаларды, ұсыныстарды жағдай жақсарғанға дейін шегере тұрамыз. Бұл барлық мемлекеттік органдарға, әкімдіктерге, ұлттық холдингтерге, ұлттық компаниялар мен мемлекеттік кәсіпорындарға қатысты. Үкіметке 2015 жылға арналған республикалық бюджетті 700 миллиард теңгеге немесе шығыстардың жалпы көлемінің 10 пайызына дейін қысқартуды тапсырамын. Бұл ретте мемлекеттің халық алдындағы әлеуметтік міндеттемелері еш өзгеріссіз қалуы тиіс»,– деген Нұрсұлтан Әбішұлы әлеуметтік саланы қолдау аясы тарылмайтындығын тілге тиек етті. Президент білім беруді және денсаулық сақтауды жаңғырту жұмыстарын жалғастыру қажеттігіне тоқталды. Сондай-ақ еңбек даулары, қысқартулар болмауы керектігін алдын ала ескертіп, барлық деңгейдегі әкімдерге жаңа жұмыс орындарын ашуды тапсырды. Үкіметтің кеңейтілген отырысында «Қазақстанда жасалған» белгісіндегі өндіріс көлемін арттыру, отандық машина жасау саласын және экспортшыларды қолдау, шағын және орта бизнес кәсіпорындары үшін инфрақұрылымдар жүргізу, АӨК-ні мемлекеттік қолдауды ұлғайту, ішкі нарықты қорғау мәселелері де сөз болды. Елбасымыз елімізде қазіргі қиындықтарды түбегейлі жеңіп шығуға мүмкіндік беретін барлық қажетті ресурстардың бар екенін атап өтті. Президентіміз саралап берген бағыттар бойынша халқымыз нәтижелі жұмыс жасаса, дағдарыстың самалын сезбей, әл-ауқатымыз арта түсетініне сенімім кәміл.
Қарлығаш БЕРГЕНЕВА,
«Семей қаласының психоневрологиялық
медициналық—әлеуметтік мекемесі» КММ директоры.
