Жер бетінде орын алған оқиғалар жайлы ақпарат жылдам тарайтын уақытта тіршілік кешіп жатырмыз. Сол себепті төрткүл дүниені экономикалық тұрақсыздық жайлағанынан хабардармыз. Әртүрлі ғалым, сарапшы атаулы бұл жаһандық дағдарысқа сан қилы сипаттама беруде. Қалай дегенмен де оның еліміздің әлеуметтік-экономикалық өркендеуіне теріс әсері тимеуі үшін, нақты шаралар ойластырылып, арнайы жоспар да құрылды. Оны сәтті жүзеге асыруға және осынау өтпелі кезеңнен қалыпты даму қарқынын сақтай отырып шығуға белгілі бір деңгейде ықпал ететін маңызды жайт бар. Нақты айтқанда, аталмыш жоспардың үздіксіз әрі жүйелі орындалуына жол ашатын жағдай қалыптастыру қажет. Таяуда Қазақстан халқы Ассамблеясы Кеңесінің мүшелері, осынау дүниежүзін тұрақсыздық жайлаған шақта, еліміздің даму қарқынын бәсеңдетпеу ниетінен туындаған осы бір ойды негізге ала отырып, елімізде кезектен тыс Президент сайлауын өткізу туралы бастама көтерді. Әрі бұл ұсыныстың халық тарапынан жасалғанын да жеткізді.
{jcomments on}«Қазақстан халқы Ассамблеясына Қазақстан Республикасы Президентінің мерзімінен бұрын сайлауын өткізу туралы бастама көтеріп, еліміздің барлық өңірлерінен көптеген азаматтар хабарласуда. Қазақстан халқы Ассамблеясы осы маңызды мәселе бойынша ұстанымын білдіруді өзінің азаматтық борышы деп санайды. Әлемдік экономикалық дағдарыс пен күрделі халықаралық жағдай орын алып отырған тұста, сайлау өткізу туралы жалпыхалықтық бастаманың көтерілуі уақыт талабы болып табылады. Бүгінде «Нұрлы жол – болашаққа бастар жол» бағдарламасын және «Қазақстан – 2050» ұзақмерзімді Стратегиясын жүзеге асыру үшін бар күш-жігерімізді біріктіру керек. Мемлекет басшысы жүргізіп отырған саясат төңірегінде топтасу арқылы еліміздің одан әрі қарқынды дамуы мен азаматтардың әл-ауқатын арттыруға қол жеткізе алатынымызға сенімдіміз»,- делінген Қазақстан халқы Ассамблеясы Кеңесі мүшелерінің үндеуінде.
Барлық жайттарды саралап, екшей келе, ел үшін пайдасы мен берері мол байыпты бастаманы қолдайтынымды айтқым келеді. Барша жұртшылықты осы үндеуге үн қосуға шақырамын. Бірлігімізді танытып, еліміздің дамуы үшін, үлкен мәнге ие ұсынысқа қолдау көрсетейік.
Саяси МАЛҒАЖДАРОВ,
Жарма аудандық Ардагерлер кеңесінің төрағасы.
