«Дүниежүзі мемлекеттерінде экономикалық дағдарыс болып жатыр» дегенді күнде естудеміз. Телеарналар, газеттер, жалпы, ақпарат көздерінің барлығы осы жайлы хабарлар беруде. Кейбір елдерде зейнетақы сияқты төлемдердің шегеріліп жатқаны туралы мәліметтер таратылып келеді. Осының өзі экономикалық дағдарыс деген құбылыстың нақты бір көрінісі болса керек. Бұл — жалпы жұртшылыққа белгілі жайт. Бізде ше? Біздің елімізде ондай жағдай орын алған емес. Зейнет-ақы, жалақы, жәрдемақы сияқты төлемдер уақытында төленгенімен қатар, жүйелі түрде көлемі өсірілуде. Яғни, Мемлекет басшысы айтқандай, халықтың алдындағы әлеуметтік міндеттемелерді жүйелі түрде орындап отыруға мүмкіндік бар деген сөз. Ал мұның, өз кезегінде, елімізде экономикалық даму қарқынының сақталып отырғанының дәлелі екені айтпаса да түсінікті. Шүкіршілік айтайық. Ойымды өрбіте келе, төрткүл дүниедегі елдердің көпшілігі тұрақсыздыққа тап болып, тығырыққа тірелген шақта, біздің мемлекетіміздің кедергі атаулының барлығын еркін еңсеріп, өркендеу жылдамдығының өсе түсуінің сыры неде деген сұраққа жауап беруді жөн санаймын. Оның бір-ақ жауабы бар. Еліміздің осынау өтпелі кезеңде де тұрақты даму қарқынын сақтауы жүргізіліп келе жатқан сарабдал саясаттың жемісі деп түсінген абзал. Қария, зейнеткер ретінде менің мемлекетіміздегі ахуалға қатысты пікірім, міне, осы. Бұл ретте өткен аптада Қазақстан халқы Ассамблеясы Кеңесінің мүшелері тарапынан жасалған Еліміздегі Президент сайлауын мерзімінен бұрын өткізу туралы ұсынысын дер кезінде айтылған ұтымды ой деп айтқым келіп отыр. Себебі ол кісілер аталмыш бастаманың қажеттілігі, ел үшін мәні мен маңызы, керектігі жайлы тәптіштеп тұрып түсіндіріп берді. Қазақстан халқы Ассамблеясы Кеңесінің мүшелері мынадай дәйектер келтірді:
{jcomments on}- Қазақстан халқы Ассамблеясына Қазақстан Республикасы Президентінің мерзімінен бұрын сайлауын өткізу туралы бастама көтеріп, еліміздің барлық өңірлерінен көптеген азаматтар хабарласуда. Қазақстан халқы Ассамблеясы осы маңызды мәселе бойынша ұстанымын білдіруді өзінің азаматтық борышы деп санайды. Әлемдік экономикалық дағдарыс пен күрделі халықаралық жағдай орын алып отырған тұста, сайлау өткізу туралы жалпыхалықтық бастаманың көтерілуі уақыт талабы болып табылады. Президенттік сайлауды мерзімінен бұрын өткізу арқылы экономика өсімін нығайту, жүргізіліп отырған саясаттың сабақтастығын қамтамасыз ету маңызды. Бұл бастамаға, шын мәнінде, басқа балама жоқ.
Үндеудің мәтінінде мерзімінен бұрын Президент сайлауын өткізу туралы ұсыныстар айтылып, барлық өңірлерден азаматтар хабарласқаны анық айтылған. Осының өзі бұл бастаманың жекелеген ұйым тарапынан ғана емес, жалпы халық атынан қозғалғанын білдіреді. Сол себепті бастаманы халықтық бастама деп айтуға толық негіз бар. Халық айтса, қалып айтпайды. Сондықтан мен жалпы елімізге ортақ бастаманы қолдайтынымды айтқым келеді.
Бәтима ТӨЛЕУБАЕВА,
зейнеткер, Семей қаласы.
