Semeytany.kz — Абай облысында Қазақстан–Қытай бағытындағы жүк ағынын ұлғайтып, өткізу қабілетін арттыруға арналған «Бақты – Аягөз» жаңа теміржол желісінің құрылысы басталды.
Жоба өңір экономикасына серпін беріп, Аягөз, Мақаншы және Үржар аудандарын қамтиды. Құрамында 12 станция қарастырылған инфрақұрылым іске қосылғанда шекаралық бағыттағы тасымал уақыты қысқарып, логистикалық тізбек оңтайланбақ. Қазірдің өзінде шамамен 150 жергілікті тұрғын құрылысқа тартылды, пайдалануға берілген соң 1200-ден аса тұрақты жұмыс орны ашылады.
Нысанның тапсырыс берушісі – «Қазақстан темір жолы» ұлттық компаниясы, мердігері – China Harbour Engineering. Жобаны жүзеге асыру үшін облыс әкімдігі қажетті жер телімдерін резервке алған. Басқарманың бас маманы Арайлым Асаубаеваның мәліметінше, құрылыс кезең-кезеңімен жүріп, барлық технологиялық талаптар сақталуда.
Қазіргі жоспар бойынша теміржол желісі 2027 жылы толық аяқталып, пайдалануға беріледі. Бұл Абай облысының көлік-логистикалық әлеуетін айтарлықтай күшейтіп, шекарааралық саудаға қосымша мүмкіндік ашады.
