Semeytany.kz — Абай облысында облыс әкімі Берік Уәлидің төрағалығымен өткен жиында ауыл шаруашылығын қарқынды дамытуға арналған өңірлік кешенді жоспардың орындалуы талқыланды. Кездесуге жауапты басқармалар мен қала-аудан әкімдері (бейнебайланыс арқылы) қатысып, 2024–2028 жылдары ауыл шаруашылығының жалпы өнімін екі еселеу міндеті аясындағы жұмысты саралады.
Ауыл шаруашылығы басқармасының басшысы Ертай Қуанбаев 2026–2028 жылдарға арналған жаңа даму моделін таныстырды. Тұжырымдама ет кластерін құруды, сүт-тауарлы фермалар желісін іске қосуды, ет бағытындағы құс шаруашылығын өркендетуді және суармалы егіншіліктің әлеуетін ұлғайтуды қамтиды.
Жаңасемей ауданында жылына 12,6 мың тонна өнім беретін ет комбинатының құрылысы жүріп жатыр. Облыста 65 мың басқа лайықталған 12 бордақылау алаңы мен 9 сүт фермасын салу жоспарланған. Құс еті өндірісін қосымша 15 мың тоннаға арттыру көзделуде. Су саласы бойынша 6 жаңа су қоймасы салынып, 31 мың гектар суармалы жер айналымға енгізілмек.
Жиын қорытындысында аймақ басшысы орынбасары Думан Оспановқа, аудан және қала әкімдіктеріне, салалық басқармаларға нақты тапсырмалар жүктеді: агроөнеркәсіпке инвестиция тартуды күшейту, қой шаруашылығын дамыту, суармалы алқаптарды ұлғайту және бұрынғы су арналарын қалпына келтіру. Сондай-ақ екінші деңгейлі банктердің инвестициясы мен несиелерін тарту жұмысы қарқын алуы тиіс екені айтылды. Әкім Бесқарағай мен Бородулихаға сүт кластеріне инвестор тартуды, ал Аягөз, Үржар, Мақаншы аудандарында құс фабрикаларын орналастырудың маңызын атап өтті. «Аягөз–Тачен» бағытындағы теміржол ашылғанда логистикалық мүмкіндік кеңейіп, өңірдің ауыл шаруашылық әлеуетін толық пайдалануға жол ашылады, деді Берік Уәли.
