Semeytany.kz — Қазақстанның Ұлттық банкі «7-20-25» жеңілдетілген ипотека бағдарламасының шарттарын кеңейтті: бұрынғы пайыздық мөлшерлеме мен негізгі талаптар сақталады, бірақ сатып алынатын тұрғын үйдің ең жоғары құны ұлғаяды.
Ұлттық банктің қаулысына енгізілген өзгерістерге сәйкес, Астана мен Алматыда және олардың қала маңы аймақтарында, сондай-ақ Ақтау, Атырау, Шымкент қалаларында баспананың шекті бағасы 25 млн теңгеден 30 млн теңгеге көтерілді. Қарағанды қаласында лимит 20 млн-нан 25 млн теңгеге өсті. Қалған өңірлер үшін шекті сома 15 млн-нан 20 млн теңгеге ұлғайды.
Қарыз алушының төлем қабілетін растау тетігі де кеңейді: енді тең қарыз алушымен қатар, кепілгер тартуға мүмкіндік бар. Сонымен бірге кредиттік өтінімді қарау кезінде қарыз алушының кірісінің тоқтаусыз түсіп отырғаны маңызды шарт ретінде қарастырылады.
Ұлттық банк бұл өзгерістер тұрғын үйдің қолжетімділігін арттырып, ипотекалық қарыздардың икемділігін күшейтуге бағытталғанын атап өтті. Қаулымен қамтылмаған өзге параметрлер мен бағдарламаның талаптары өзгеріссіз қалады.
