Semeytany.kz — Мемлекет басшысы Қасым-Жомарт Тоқаев Парламенттік реформа жөніндегі жұмыс тобының алғашқы отырысында бұл мәселе Қазақстан мемлекеті мен халқының тағдырына тікелей ықпал ететінін атап өтті. Президент реформа қоғамда, сарапшылар арасында және Парламентте кеңінен талқылануы тиіс екенін айтты.
Тоқаев бір палаталы Парламентке көшу әлемдік үрдіске сай келетінін, алайда асығыстыққа жол берілмейтінін мәлімдеді. Оның айтуынша, мұндай маңызды қадам тек кең ауқымды қоғамдық талқылаудан кейін қабылдануы қажет.
Президенттің сөзіне қарағанда, реформаны іске асыру үшін алдымен Конституцияға өзгерістер енгізіледі: Негізгі заңның 40-қа жуық бабы түзетіледі. Одан кейін кем дегенде 10 конституциялық заңға және 50-ден астам кодекс пен өзге заңдарға өзгерістер қажет болады. Тоқаев бұл ауқымды жұмыс «жаңа Конституция қабылдаумен тең» екенін атап өтті.
Осыған дейін Мемлекет басшысы 8 қазан күні Парламенттік реформа жөніндегі жұмыс тобын құру туралы өкімге қол қойған еді. Топ Президенттің 8 қыркүйектегі Жолдауында жарияланған бастамаларды жүйелі түрде іске асыру бойынша ұсыныстар әзірлейді.
