Жеңістің 70 жылдығына орай, Абыралы ауылдық клуб үйінде клуб қызметкері Жомарт Тоқтағазыұлының ұйымдастыруымен «Біз жеңіскерлердің ұрпағымыз» атты ауыл жастары арасындағы үстел теннисінен жарыс өтті.
{jcomments on}Жарысқа 16 спортшы қатысты. Ашылу салтанатында сөз алған клуб меңгерушісі Әлия Өмірзаққызы бұл сайыстың бабаларға тағзым екендігін айта келе, жастарды Елбасымыздың «Нұрлы жол — болашаққа бастар жол» атты Жолдауын жүзеге асыру барысына атсалысуға шақырып, қатысушыларға сәттілік тіледі.
Жарыстың әділ өтуіне Абыралы жалпы негізгі орта білім беретін мектебінің дене тәрбиесі пәнінің мұғалімі Роллан Маметов төрелік жасады. Жарыстың үзіліс кезеңде-рінде қатысушылар мен жанкүйерлерге арнап әнші студент ұлдарымыз Аян Біржанов пен Түскей Нығыметовтер «Қазақтай ел қайда?», «Қазақ жастары» әндерін тарту етті. Қызу тартысқа толы ұзаққа созылған жарыс нәтижесінде І орынды Арнұр Слямбаев иеленсе, жүлделі ІІ орынды Қуаныш Сағадиев, ІІІ орынды Тілеген Мұхамадиев еншіледі. Ал «Белсенділігімен көзге түскен ойыншы» номинациясы бойынша Ертарғын Исабаев, «Үздік ойыншы» номинациясы бойынша Азамат Түсіпбеков марапатталды. Жеңімпаздар клуб әкімшілігінің демеушілігімен дайындалған ақшалай және заттай сыйлықтармен, грамоталармен, барлық қатысушылар естелік сыйлықтармен марапатталды. Ауыл жастары арнайы орынға жүлде тікті. Жарыс соңында ұйымдастырушылар мен барлық қатысушылар әуезді әуеннің ырғағымен «Атамекен» әнін шарықтата шырқады.
Ерлігімізбен, елдігімізбен марқаятын абыройымызды асқақтатар мерекелер, іс-шаралар, дүбірлі жарыстар жыл бойы жалғасын табады.
Ә. САДУАХАСОВА,
Абыралы ауылы.
