Аягөз ауданында мектеп оқушылары арасында шағын футболдан жарыс өтті. Спорт сайысы Кеңес әскерлерінің Ауған жерінен шығарылуына 26 жыл толуына орай ұйымдастырылды. Жарысқа, мектеп оқушыларымен бірге, әскери бөлімдер қызметкерлерінен құралған командалар да қатысты.
{jcomments on}Аудандық білім бөлімі мен дене шынықтыру және спорт бөлімі ұйымдастырған жарыс ақпан айының 13-14 күндері өтті. Сайысқа орта мектептерден 8 команда, әскери бөлімдерден 8 команда қатысты. Әскери бөлімдердің командалары әр мектепке бөлініп, жалпыесептік көрсеткіште осы екі командалардың жинаған ұпайлары арқылы анықталды.
Ашылу салтанатында аудан әкімі Б. Байахметов қатысушыларға жылы лебізін айтып, әдемі ойын өрнегін көрсетулеріне тілектестігін жеткізді. Ауған соғысы ардагерлерінің атынан сөз алған Б. Бураханов та мектеп оқушылар мен әскерилерді құттықтап, сәттілік тіледі. Мәдениет үйінің әртістері әннен шашу шашты.
Жарыстың бас төрешісі Ауған соғысының ардагері Р. Бейсеков жарыстың өту тәртібімен таныстырды. Әскери бөлімдер командалары спорт кешенінде, оқушылары спорт мектебінде ойнап, ақтық ойындар әскери бөлімнің спорт ғимаратында болатынын хабарлады. Жарыс қызықты да тартымды өтті. Оқушылар тек футбол ғана ойнамай, 10810 әскери бөліміне барып сарбаздардың күнделікті тыныс-тіршілігімен танысып , қару жарақ мұражайын аралап, бірқатар мағлұматтар алды.
Жарыс қорытындысы бойынша оқушылар арасында І орынды № 4 орта мектеп командасы, ІІ орынды Ж. Жабаев атындағы орта мектеп командасы, ІІІ орынды Тарбағатай орта мектебінің командасы иеленді.
Әскери бөлімдер командалары бойынша 10810 (2) әскери бөлім І орын, 18110(1) әскери бөлім ІІ орын, 97616 (2) әскери бөлім ІІІ орын алды. Жалпыесептік көрсеткіш бойынша № 4 орта мектебі мен 97616 (2) әскери бөлімнің командалары жеңіске жетті.
Жарыс соңында жеңімпаздар мен жүлдегерлер дене шынықтыру және спорт бөлімінің, Ауған соғысы ардагерлері кеңесінің мақтау қағаздарымен, кубоктарымен марапатталды. Оларды 10810 әскери бөлімнің командирі Т.Турғанбаев, Ауған соғысының ардагерлері Набай Сибағатов, Рымбек Бейсеков, Болат Бураханов, Марат Кусайынов, Бейбіт Жатақбаев, Аягөз қаласының қорғаныс істері жөніндегі біріктірілген бөлімінің бастығы С. Айтқазин, аудандық дене шынықтыру және спорт бөлімінің маманы Ф. Усманов табыс етті.
Ж. ЖАҚИЯНОВА,
Аягөз ауданы.
