Semeytany.kz — Абай облысының әкімі Берік Уәлидің төрағалығымен өткен кеңесте тұрғындарды ауыз сумен қамтамасыз ету мәселесі талқыланды. Жиынға аудан және қала әкімдері бейнережим арқылы қатысты.
Облыстық энергетика және тұрғын үй-коммуналдық шаруашылық басқармасының басшысы Раджан Сейітқановтың мәліметінше, мемлекет басшысының елді мекендерді 100 пайыз ауыз сумен қамтамасыз ету жөніндегі тапсырмасын орындау мақсатында өңірде 33 жоба жүзеге асырылып жатыр. Оның алтауы аяқталып, халыққа су берілген.
Ауыз су инфрақұрылымына қатысты жобалар облыстың 1 қаласы мен 9 ауданын қамтиды. Жобаларда су құбырын тарту, су көздерін жаңғырту және жаңа нысандар салу қарастырылған. Құрылыс жұмыстары бекітілген кесте бойынша жүргізілуі тиіс.
Берік Уәли барлық нысандардағы жұмысты күнделікті мониторингтеуді тапсырды. Әкімдерге жыл соңына дейін аяқталуы тиіс жобаларды толық іске қосу үшін нақты шаралар қабылдау жүктелді. «Халықты сапалы ауыз сумен қамту – өмір сүру сапасын арттыратын басты міндет. Жобаларды уақытында әрі сапалы аяқтау – әкімдердің тікелей жауапкершілігі», – деді облыс әкімі.
