Семей қаласының есірткіге қарсы күрес бөлімінің қызметкерлері есірткі тасымалының жолын кесу үшін, ҚР Ішкі істер министрлігінің жоспарына сәйкес,16-22 ақпан аралығында ел көлемінде арнайы шара өткізді.
{jcomments on}Қалалық ІІБ баспасөз қызметінің жетекшісі Елубек Оспановтың айтуынша, «Допинг» операциясының аясында қаладағы бір жекеменшік таксопарктің такси жүргізушісі ұстал-ған. Ол, жолаушы тасымалдаумен қатар, есірткі затын сатумен де айналысқан.
— Жедел алдын алу шарасы барысында 2015 жылдың қаңтар айынан бастап қаладағы бір такси жүргізушісі есірткі затын сатумен айналысады деген шұғыл хабар түсті. Осы хабарды анықтау мақсатында Семей қалалық ІІБ есірткі бизнесіне қарсы күрес және криминалдық полиция бөлімі қызметкерлерімен бірлесе арнайы топ құрып, арнайы жүргізілген жедел іздестіру шарасы кезінде есірткі сатумен айналысқан азаматты құрықтады. Қылмысты әшкерелеу барысында жүргізушіден арнайы сатуға дайындалған есірткі заты тәркіленген. Ал ары қарай тергеу жұмысын жүргізу кезінде үйінен есірткі затын сатып алуға арналған 40 мың теңге мен гаражынан мөлшері 8 келіден аса есірткі заты (кеп-тірілген марихуана) тәркіленді, — дейді Е.Оспанов.
Такси жүргізушісі бұрын бұзақылық жасағаны үшін істі болған екен. Айта кету керек, оны құрықтау барысында еш жерде жұмыс жасамайтын сыбайласы да қолға түсіп отыр. Жас жігіт оған есірткі затын саудалауға қол ұшын беріп отырыпты. Енді ол да заң алдында жауап береді. Қазіргі таңда ұсталған азамат үстінен ҚР Қылмыстық Кодексінің 297-бабы бойынша қылмыстық іс қозғалған. Айта кетейік, «Допинг» операциясының барысында заң бұзған дәріхана сатушысы да анықталып отыр. Полицейлердің мәліметінше, қала орталығында орналасқан дәріхана қызметкері ешқандай дәрігердің рұқсатынсыз құрамында нашақорлық және жүйкеге әсер ететін дәрілерді саудалап келген. Қазір бұл іс бойынша да тергеу амалдары жүргізілуде.
Асан МЫРЗАХАНОВ,
«Семей таңы»
