Семей – Алаштың алтын бесігі, Абайдың рухы мен ел мұраты тоғысқан киелі мекен. Бүгінде облыс орталығына ерекше назар аударылып, қала жаңаша тыныс алып, заман талабына сай жаңғыртылуда. Берік Уәлиұлының қолдауымен Абай облысында инвестиция тарту мен жаңа өнеркәсіптік база қалыптастыру бағытында жүйелі жұмыстар қолға алынып, өңірдің экономикалық және мәдени келбеті бұрын-соңды болмаған өзгерістерге бет алды.
Абай облысы әкімінің бірінші орынбасары Ербол Садырдың айтуынша, қазіргі таңда аймақта индустриялық инфрақұрылымды кеңейту мен өндірістік әлеуетті арттыру жұмыстары белсенді жүріп жатыр.
– Бүгінде аумағы 96 гектарды құрайтын «Өндіріс» индустриялық аймағын 186 гектарға дейін кеңейту шаралары жүзеге асырылуда. Сонымен қатар, шағын өнеркәсіп паркін құруға дайындық басталды. Инвесторлардың жоғары қызығушылығы жаңа индустриялық аймақтардың қажеттілігін көрсетеді. Осыған байланысты Семейдің өнеркәсіптік аймағында арнайы экономикалық аймақ құру үшін 500 гектар жер бөлу жоспарланған. Бұл бастама шетелдік және отандық инвестицияны тартуға, жаңа өндірістер мен жұмыс орындарын ашуға жол ашады, – деді әкімнің бірінші
орынбасары.
Сонымен бірге, облыста Мемлекет басшысы бастамашы болған «Абайға құрмет» республикалық акциясы қарқынмен жалғасуда. Бұл игі шара еліміздің 14 өңірін ұлы Абай рухы астында біріктіріп, Семейдің әлеуметтік және мәдени бейнесін жаңартуға бағытталған.
– Қазіргі таңда 14 өңір Семей қаласында жаңа нысандардың құрылысын қолға алды. Нысандардың басым бөлігі қаланың жаңа бөлігінде салынады. Бұл аймақта әкімшілік және мәдени ғимараттармен қатар, 300 гектар аумақта көпқабатты тұрғын үйлер, 7 мектеп, 10 балабақша және заманауи емханалар бой көтермек. Нәтижесінде аталмыш аумақ Семейдің жаңа әкімшілік-іскерлік орталығына айналады, – деді Ербол Садыр.
Спикердің мәліметінше, бүгінде жобаларды сапалы іске асыру үшін қаланың бас жоспары қайта қаралып, егжей-тегжейлі жоспарлау жобалары әзірленіп жатыр.
