Semeytany.kz — Облыс әкімі Берік Уәли бүгін Парламент Мәжілісіндегі «Respublica» партиясының депутаттары Екатерина Смолякова мен Динара Наумовамен жүздесіп, өңірдің дамуына қатысты өзекті мәселелерді талқылады.
Кездесуде аймақтың әлеуметтік-экономикалық өсімі, инфрақұрылымдық жобалардың орындалу барысы, туризм мен кәсіпкерлікті қолдау тетіктері сөз болды. Әкімдік тарапынан жылу, су, электр желілерін жаңғырту, жолдарды жөндеу, әлеуметтік нысандар салу, инвестиция тарту, сондай-ақ ауыл шаруашылығы, туризм және шағын-орта бизнес бағыттарына басымдық беріліп отырғаны атап өтілді.
Депутаттар Абай облысының жаңадан құрылған аймақ ретіндегі ерекшеліктеріне мән беріп, туризм мен кәсіпкерлік салаларындағы түйткілдерді алдағы уақытта депутаттық сауал арқылы көтеруге әзір екендерін жеткізді.
Партиялық инфрақұрылым бойынша, «Respublica» партиясының облыстық филиалында қазіргі таңда 1767 мүшесі бар, филиал жанында 15 адамнан тұратын өңірлік кеңес жұмыс істейді.
