Semeytany.kz — Абай облысының Бесқарағай ауданында ауыл тұрғындарының денсаулығын нығайтуға бағытталған жаңа әлеуметтік нысан пайдалануға берілді. Ерназар ауылында заманауи талаптарға сай салынған дәрігерлік амбулатория ашылды.
Кешен «Ауылдық денсаулық сақтауды жаңғырту» ұлттық бағдарламасының аясында жүзеге асты. Бағдарлама шеңберінде аудан бойынша барлығы 11 жаңа медициналық нысанның құрылысы аяқталып, іске қосылды: 4 дәрігерлік амбулатория, 1 фельдшерлік-акушерлік пункт және 6 медициналық пункт.
Ерназардағы амбулатория ауыл тұрғындарына алғашқы медициналық көмекті сапалы әрі қолжетімді ұсынуға мүмкіндік береді. Нысан ішінде физиотерапия және процедуралық кабинеттер, орта буын медицина қызметкерлеріне арналған бөлмелер және дәріханалық пункт қарастырылған.
Жаңа ғимарат қажетті медициналық құрал-жабдықтармен толық жарақтандырылған: нейбулайзер, электрокардиограф, дефибриллятор, екі арналы сенсорлы магнитотерапия аппараты, спирометр, сондай-ақ жоғарғы тыныс алу жолдарын ультракүлгін сәулемен емдеуге арналған стационарлық құрылғы орнатылған.
Ауылдық денсаулық сақтау жүйесін жаңғыртуға бағытталған осындай жобалар шалғай елді мекендерде медициналық қызметтің қолжетімділігін арттырып, өңірдегі алғашқы буын көмек сапасын көтереді. Республика күні мерекесіне орай ауданның Белокаменка және Стеклянка ауылдарында да жаңа медициналық пункттер ашылғаны белгілі.
