Ақпан айының жиырмасы күні қалалық Мәдениет сарайында «Котнаби» кәріс ұлттық ән-би ансамблінің концерті өтті. Қазақ хандығының 550 жылдығы, Ұлы ақын Абай Құнанбайұлының 170 жылдығы, Қазақстан халқы Ассамблеясының 20 жылдығы, Ата заңымыздың 20 жылдығы, Жеңістің 70 жылдығы сияқты мерейтойлық даталарды атап өту аясында ұйымдастырылған шара кәріс халқының жаңа жылы «Соллаль» мерекесіне арналды. Концерт барысында көрермендер назарына «Котнаби» ансамблінің орындауындағы билер мен әндер ұсынылды.
{jcomments on}Кәріс халқының ұлттық мерекесі «Соллаль» ай күнтізбесі бойынша 21 қаңтар мен 20 ақпан аралығында аталып өтіледі. Биыл аталмыш мейрамды ақпан айының 20 күні атап өту ұйғарыл-ған. Концерт барысында Қазақстан кәрістері ассоциациясының Семей қаласындағы филиалының төрағасы Ким Владимир жиылған қауымға жылы лебізін арнады. Өз сөзінде ол мерекелік шараға келген көрермендерге алғысын білдірді. Ай күнтізбесі бойынша жаңа жылды кәрістермен қатар, оңтүстік-шығыс Азияның барлық халықтары да атап өтетінін тілге тиек етті.
— Қазақстанда кәрістердің тұрып жатқанына жетпіс жылдан асты. 1937 жылы Қиыр Шығыстан жер аударылды. Сол кезде қонақжай, мейірбан қазақ халқының арқасында кәрістер аман қалды. Сол үшін қазақ халқына шын жүректен алғысымды айтып, басымды иемін. Қазіргі таңда Ұлт Көшбасшысы Нұрсұлтан Назарбаев жүргізіп отырған сарабдал саясаттың арқасында жүзден астам этнос өкілдері бейбіт те мамыражай өмір сүруде. Кәрістер де, барлық азаматтармен бірге, еліміздің қарқынды дамуына үлес қосып келеді және болашақта да мемлекетіміздің өркендеуіне аянбай еңбек етеді деген сенімдемін,- дей келе, Владимир Ким мерекелік шараның Қазақ хандығының 550 жылдығы, Ұлы ақын Абай Құнанбайұлының 170 жылдығы, Қазақстан халқы Ассамблеясының 20 жылдығы, Ата Заңымыздың 20 жылдығы сияқты мерейтойлық даталарды атап өту аясында ұйымдастырылғанын айтты.
Мерекелік концерт барысында көрермендер «Котнаби» ансамбілі өнерпаздарының орындауындағы ұлттық билерді тамашалады. Сондай-ақ қалалық Мәдениет сарайының әншілері кәріс тілінде әндер орындап, жиылған қауымды тәнті етті. Шара соңында көрермендер концерттік бағдарламаға көңілдері толғандығын білдіріп, ризашылықтарын айтып тарқасты.
Мирас ҚҰСАЙЫН,
«Семей таңы»
