Қазақстан халқы Ассамблеясының 20 жылдығына орай, «20 ізгі іс» эстафетасының бас белгісі – тайқазан сейсенбі күні Семей қаласына жетті. Татулық символын қарсы алу рәсіміне жергілікті этномәдени бірлестік өкілдері, зиялы қауым, студенттер мен мектеп оқушылары қатысты.
{jcomments on}Түркістан қаласынан шыққан тайқазан бұған дейін Астана қаласы, Ақмола, Солтүстік Қазақстан және Павлодар облыстарын аралып, ізгі іске толып қайтты. Облыс делегациясы татулық пен бірлік белгісіне баланатын тайқазанды Павлодар облысына арнайы барып алып келген.
Қожа Ахмет Яссауи кесене-сіндегі тайқазанның символикалық үлгісін ортаға алып шығу рәсімі қалалық Достық үйінде өтті. Тайқазан символын қазақтың екі батыры алып жүрді. Ал ұлттық киімдегі әжелеріміз делегация мен қатысушыларға шашу шашып, орыс ұлтының өкілдері нан-тұзбен қарсы алу рәсімін өткізді. Рәсімдерден кейін тайқазан символы Достық үйіне енгізіліп, делегаттар, этномәдени бірлестіктердің өкілдері жиынға қатысты. Тайқазан символын ортаға алған қатысушылар алдында сөз алған қалалық Достық үйінің директоры А.Тілеубаев жиналғандарды Қазақстан халқы Ассамблеясы жылымен құттықтады.
— Бұл — еліміздегі үлкен мереке. Бүгін біз «20 ізгі іс» эстафетасын жалғастырамыз. Тайқазан символы Семей қаласына келіп жетті. Республикалық эстафетаның бас символы бол-ған тайқазан үлгісі қасиетті Түркістан қаласынан бастау алып, бас қала Астана арқылы республикамыздың барлық өңірлерін аралауда, — деп атап өтті.
Өз кезегінде сөз алған Шығыс Қазақстан облыстық Қазақстан халқы Ассамблеясы хатшылығының басшысы Еркінбек Аязбаев:
— Еліміздегі Ассамблея жылында ата-бабамыздан көне жәдігер ретінде мұра болып келе жатқан Тайқазан қоғамның ауызбіршілігін сақтай отырып, тату-тәтті тұрмыс кешудің тамырын тереңдете түссін. Тайқазанның іші игі істерге толы болып, ел игілігіне айналуына тілектеспіз. Шараның негізгі мақсаты игі істер жасау арқылы барша халыққа көмек көрсету болып табылады. Бұл шара Астана қаласында өз мәресіне жетеді. Оның қорытындысына облыстан арнайы делегат қатысады. Елімізді аралап жүрген асыл қазынамыз — тайқазан достыққа, бірлікке шақырады. Бұл жақсы үрдіс қалыптастырады деген ойдамыз, — деді өз сөзінде.
Эстафета аясында көмекке мұқтаж жандарға қолдау көрсетіліп, қайырымды істер атқарылып, ұлттың бірлігі ұлықталады. Тайқазан Қазақстан халқы Ассамблеясы жылы аясындағы республикалық эстафетаның бас белгісі ретінде жайдан-жай таңдалып алынбаған. Ол ежелден халықты тоқшылық, қайырымдылық және татулыққа бастаған. Енді, міне, еліміздегі бірлік пен мейірімді істің шарапатына да қызмет етпекші.
— Бүгін баршамыз үлкен бір жақсы істің куәсі болып отырмыз. Өздеріңіз білесіздер, Елбасының Жарлығымен биылғы жыл «Қазақстан халқы Ассамблеясы жылы» деп белгіленген болатын. Бүгін Ассамблеяның бастамасымен басталған «20 ізгі іс» акциясының қатысушысы болып отырмыз. Шара барысында қаламыздың әрбір тұрғыны бір жақсы іс жасайтын болса, бұл біздің қосқан үлесіміз болып табылар еді. Акцияны ұйымдастырып отырған Достық үйі мен оның басшысына және әрбір ұлттық мәдени орталықтарға үлкен алғысымды білдіргім келеді. Семей қаласы да аталмыш акцияға өз үлесін қосатын болады, — деген қала әкімінің орынбасары Зәуреш Исабаева мерейлі міндетті жүзеге асыруға семейліктердің атсалысатынын жеткізді.
Шара соңында «Қазақстан халқы Ассамблеясына 20 жыл — 20 ізгі іс» акциясы аясында қалалық этномәдени бірлестіктердің мүшелері «20 ізгі істі» тайқазанға салу рәсімін жүргізді. Сондай-ақ татулық символын облыс орталығы Өскемен қаласына тапсырды.
Ізгі істерге толы шара елордада қорытындыланады. Халықты бірлікке шақырған тайқазан сәуірде өтетін Қазақстан халқы Ассамблеясының XXII сессиясында Елбасына тапсырылмақ.
Асан МЫРЗАХАНОВ,
«Семей таңы»
