Semeytany.kz — Облыс әкімі Берік Уәлидің төрағалығымен өткен кеңейтілген аппараттық кеңесте «Жұмысшы мамандықтар жылы» бойынша жоспардың орындалуы, мемлекеттік жастар саясаты және бұқаралық спортты дамыту мәселелері талқыланды. Кеңеске облыстық басқарма басшылары мен өңірлік департамент жетекшілері қатысып, қала-аудан әкімдері онлайн қосылды.
Колледждердегі ахуал туралы облыстық білім басқармасының басшысы Бауыржан Ердембеков баяндады. Бүгінде өңірдегі 32 колледжде 20 мыңнан аса студент оқиды, олардың 75 пайызы мемлекеттік тапсырыс негізінде білім алуда. Соңғы екі жылда колледждер желісі оңтайландырылып, материалдық-техникалық база кезең-кезеңімен жаңарып келеді. «Барлығына арналған кәсіптік-техникалық білім беру» жобасы аясында үш жылда мемлекеттік тапсырыс көлемі ұлғайып, 21 колледж жұмысшы мамандықтары бойынша кадр дайындауда, бұл бағытта 4 мың студент білім алып жатыр.
Нарық сұранысына сай оқу-өндірістік инфрақұрылым кеңейтілуде: биыл алты колледждің жабдығы жаңартылды, әлеуметтік серіктестер қолдауымен жаңа оқу және тәжірибе орталықтары ашылды. «ҚТЖ», «Қазақстан су жолдары», «Қазполиграф» сияқты кәсіпорындармен бірлескен заманауи өндірістік кабинеттер іске қосылды. Өңір студенттері WorldSkills пен «Abilympics-2025» чемпионаттарында жоғары нәтиже көрсетуде: облыс командасы республикалық WorldSkills-те екі жыл қатарынан І орын алды, EuroSkills Herning 2025 сайысында үш студент ел намысын қорғады. Ерекше білім қажеттілігі бар жастар да республикалық деңгейде жүлделі болды. Мектептерде 43 мамандандырылған сынып ашылып, оқушылардың еңбек нарығына ерте бейімделуіне жағдай жасалды.
Кеңес қорытындысында аймақ басшысы еңбек нарығына мұқият талдау жүргізіп, кәсіпорындарға қажет жұмысшы кадрлардың нақты санын айқындауды, дуальды оқыту мен тәлімгерлікті күшейтуді, колледж–кәсіпорын әріптестігін кеңейтуді, түлектердің жұмысқа орналасуын тұрақты бақылауда ұстауды тапсырды. «Президент бастамасымен жарияланған «Жұмысшы мамандықтары жылының» аяқталуына екі ай қалды. Жасалған жұмыстар бар, алайда нақты талдауға сүйене отырып, қарқынды күшейту қажет», — деді Берік Уәли.
