Semeytany.kz — Қазақстан Республикасының Оқу-ағарту министрі Жұлдыз Сүлейменова Абай облысына жұмыс сапарымен келіп, облыс әкімі Берік Уәлимен бірге бірнеше білім нысанын аралады. Сапар барысында материалдық-техникалық база, білім сапасын арттыру шаралары және кадр әлеуеті талқыланды.
Жарма ауданына барған делегация 2010 жылы ашылған Ақтайлақ би атындағы орта мектепте болды. Мұнда 226 оқушыға 40 педагог дәріс береді. 22 оқу кабинеті, 180 орындық акт залы, 96 орындық асхана, спорт залы және 14 мыңнан астам қоры бар кітапхана жұмыс істейді. Мектеп оқушылары облыстық және республикалық олимпиадаларда жоғары нәтиже көрсетіп келеді: биыл 4 түлек «Алтын белгі» иегері атанып, бірнеше түлек мемлекеттік грантқа түсті. Сондай-ақ «Ай қанат» жобасы аясында бірқатар гранттар жеңіп алынған.
Ауданның Суықбұлақ ауылында апатты мектептің орнына 100 орындық жаңа білім ошағы салынуда. Құрылыстың шамамен 40 пайызы аяқталған: бірінші қабат көтерілді, жеке спорттық блок қарастырылған. Нысан заманауи технологиямен жабдықталып, аулаға демалыс аймағы мен футбол, волейбол, баскетбол және гимнастика алаңдары орнатылады. Бұған дейін 1964 жылы балабақша ретінде салынған ескі ғимарат апатты деп танылып, бастауыш сыныптар сол жерде, 5–11-сынып оқушылары көрші ауылға автобуспен қатынап оқып келген. Жаңа мектептің іргетасы 18 маусымда қаланды, толық аяқталуы 2026 жылдың сәуіріне жоспарланған.
Семей қаласында 1985 жылы ашылған №9 «Айгөлек» бөбекжайы инклюзивті білім берудің үлгісі ретінде таныстырылды. Қазір мұнда 284 бала тәрбиеленуде: 12 топтың алтауы — түзету бағытында. Мекемеде ресурстық инклюзивті кабинет, логопед және ұлттық құндылықтар кабинеттері, спорт және музыка залдары бар. 37 педагог қызмет етеді. Балабақша тәрбие процесіне жасанды интеллект элементтерін енгізуімен ерекшеленеді.
Қорытындысында Жұлдыз Сүлейменова екі күнде үш ауданның нысандарын аралап, өңірде білім инфрақұрылымын жаңғырту, педагог мәртебесін көтеру және балалардың сапалы білім алуына жағдай жасау бағытындағы жұмыстар жүйелі түрде жалғасатынын атап өтті.
