Үржар ауданында жол-көлік инфрақұрылымын жаңарту бағытындағы жұмыстар жүйелі түрде жалғасып келеді. Ағымдағы жылы Жоғарғы Егінсу ауылына кіреберіс 3,5 шақырымдық жол орташа жөндеуден өтті. Бұл туралы Үржар ауданының әкімі Ақылбек Башимбаев Өңірлік коммуникациялар қызметінде өткен баспасөз мәслихатында хабарлады.
– «Ауыл – Ел бесігі» бағдарламасы аясында ұзындығы 14 шақырым болатын 18 көшеге орташа жөндеу жүргізуге 480 млн теңгеден астам қаржы бөлінді. Жобаға Ақжар, Жаңа тілек, Қарақол және Жанай ауылдары қамтылды. Оның ішінде 10,3 шақырым жолға жаңа асфальт төселді. Ал Қарақол ауылындағы 3,7 шақырымдық учаске өтпелі жоба ретінде 2026 жылы толық аяқталады, – деді аудан басшысы.
Сонымен қатар республикалық маңызы бар Таскескен–Бақты тас жолының 19 шақырымында да жөндеу жұмыстары жүргізілуде.
– Биыл аудан жолдарындағы жол қауіпсіздігін арттыру мақсатында 13 ауылда жол белгілері орнатылды (17,8 млн теңге). Бұған қоса, Үржар, Ақжар және Науалы ауылдарында бейнебақылау жүйелері жаңартылды. 7 млн теңге қаражатқа Науалыда – 16, Ақжарда – 15 жаңа камера орнатылып, Үржар ауылындағы құрылғылар саны 110-ға жетті, – деп түйіндеді Ақылбек Башимбаев.
